Tags-Waqt

vo baat soch ke maiñ jis ko muddatoñ jiitā
bichhaḌte vaqt batāne kī kyā zarūrat thī

kaash vo vaqt na aa.e mirī duniyā meñ kabhī
jab mohabbat kī har uftād se Dar lagtā hai

vaqt se bach na sakoge tum bhī
jo karoge vo bharoge tum bhī

hai ehtisāb-e-vaqt kī laTkī huī salīb
har roz jaise roz-e-jazā daam chaḌh ga.e!

honī huuñ kisī haal meñ Talne kī nahīñ huuñ
maiñ vaqt ke hāthoñ se nikalne kī nahīñ huuñ

maiñ ne yaaro tum se sunā thā vaqt kā marham bhar de har ġham
aglī pichhlī saarī bāteñ mujh ko bhuul hī jaanā thā

dast-e-ḳhūnīñ na kabhī vaqt uThā.e tujh par
hukm lamhoñ pe chalā Dhaal banā le shab-o-roz

vo patthar hai pighalne meñ zarā sā vaqt to legā
abhī mumkin nahīñ hai us se koī guftugū honā

dushmanoñ ko mire hamrāz karoge shāyad
vaqt-e-tanhā.ī meñ āvāz karoge shāyad

kar diyā qaid hameñ vaqt kī dīvāroñ ne
varna ham log bhī the chhūTte tīroñ kī tarah

kyuuñ bhaveñ tānte ho banda-navāz
siina kis vaqt maiñ sipar na kiyā

ek hī raftār se kashtī ko mat khenā yahāñ
vaqt kā dariyā kahīñ uthlā hai to gahrā kahīñ

kis se paimān-e-vafā bāñdhte ho
vaqt kā āb-e-ravāñ hai ye to

ye vaqt kis kī ra.ūnat pe ḳhaak Daal gayā
ye kaun bol rahā thā ḳhudā ke lahje meñ

aish ke yaar to aġhyār bhī ban jaate haiñ
dost vo haiñ jo bure vaqt meñ kaam aate haiñ

kahīñ to vaqt jaise ruk gayā thā
kahīñ par umr bhī lamhāt meñ thī

'alvī' sāhab vaqt hai ārām kā
so raho sab kuchh bhulā kar raat meñ

ayyām-e-vasl par to bharosa na kījiyo
ye vaqt merī jaan kabhī hai kabhī nahīñ

duniyā kuchh bhī kahe magar 'jāzib'
vaqt be-e'tibār hai mire dost

jhuñjhlā ke kyuuñ na chhīn luuñ TuuTā hai vo azaab
phir vaqt ghūmtā hai liye dard kī zakāt