Tags-Waqt

is vaqt se kyā hai mujhe to charāġh-e-vaqf
maḳhlūq jab jahāñ meñ nasīm-o-sabā na thī

vaqt-e-safar ḳhamosh haiñ bosa-kinān-e-lab
un se kalām kījiye un ko rulā.iye

phir yuuñ huā ham us meñ kahīñ mahv ho ga.e
us ne kahā thā vaqt ko sakte meñ lā.iye

muñd ga.iiñ kholte hī kholte āñkheñ hai hai
ḳhuub vaqt aa.e tum is āshiq-e-bīmār ke paas

ġhanīmat samajh vaqt-e-fursat ko ġhāfil
na haath aa.egā phir ye mauqa.a jo ab hai

jis vaqt us ne baḳht hamāre banā.e the
ham ne hatheliyoñ pe sitāre banā.e the

sāñjh savere mauj meñ apnī
bahtā jaa.e vaqt kā dhārā

bichhaḌte vaqt vo taqsīm kar gayā mausam
bahār us kī taraf hai ḳhizāñ hamārī taraf

guzishta raat mujhe paḌhte vaqt vahm huā
varaq pe harf nahīñ haiñ ye haiñ kitāb meñ saañp

kanār-e-bahr hai dekhūñgā mauj-e-āb meñ saañp
ye vaqt vo hai dikhā.ī de har hubāb meñ saañp

TuuTe shīshe kī āḳhirī nazm
bhāgte vaqt ko maiñ aaj pakaḌ laayā huuñ

aaj ḳhud hī be-tahaffuz haiñ zamāne ke ḳhudā
vaqt vo hai ḳhud haiñ saa.e kī savālī chhatriyāñ

allāh re vo vaqt vo majbūrī-e-hayāt
ro ro ke ho rahe the judā jab kisī se ham

vaqt ke tūfānī sāgar meñ krodh kapaT ke rele haiñ
lekin aas ke māñjhī har lahza maujoñ se khele haiñ

ham bhī usī ke saath ga.e hosh se 'sa.īd'
lamha jo qaid-e-vaqt se bāhar chalā gayā

adhūre ḳhvāb kā chehra udāsī
badalte vaqt kā lahja udāsī

lazzat kā zahr vaqt-e-sahr chhoḌ kar koī
shab ke tamām rishte farāmosh kar gayā

jis vaqt āñkheñ ḳhvāb ā.īna dil hotā hai
sher nahīñ likkhā jaatā nāzil hotā hai

har nafas har qadam har na.e moḌ par vaqt ik zaḳhm-e-nau de rahā hai magar
vaqt ḳhud apne zaḳhmoñ kā marham bhī hai vaqt ke saath har zaḳhm bhar jā.egā

shyām gokul na jaanā ki rādhā kā jī ab na bansī kī tānoñ pe lahrā.egā
kis ko fursat ġham-e-zindagī se yahāñ kaun be-vaqt ke raag sun pā.egā