Tags-War

mujāhid jañg ke maidāñ ko jaa.e jis tarah ghar se
ye manzar zehn meñ rakh kar mujhe izn-e-safar denā

ham amn chāhte haiñ magar zulm ke ḳhilāf
gar jañg lāzmī hai to phir jañg hī sahī

dikhā.ī jañg meñ sūrat udhar jā pahuñche vo kausar
ye asġhar hī kī thī raftār idhar aanā udhar jaanā

bilā-javāz nahīñ hai falak se jañg mirī
aTak ga.ī hai sitāre meñ ik patañg mirī

hai nishāñ jañg se bhaag aane kā
ghar mujhe bā.is-e-rusvā.ī hai

Dhañg hai samā.at kā rañg hai basārat kā be-tarah-o-be-ma.anī
nañg ke liye dauḌeñ ham bhī saarī duniyā meñ ek jañg jaarī hai

anā hī dost anā hī harīf hai merī
isī se jañg isī ko sipar bhī karnā hai

miyān-e-jañg musalsal kamān khīñch ke rakh
guhar har ek shanāvar kā dhyān khīñch ke rakh

baqā ke vāste sadiyoñ se jañg jaarī hai
fanā ke shor-sharābe se naak meñ dam hai

zamāna guzrā hai lahroñ se jañg karte hue
kabhī to paar lagūñ Dūbte ubharte hue

kashtiyāñ saarī jalā Dālīñ anā kī jañg meñ
maiñ ne bhī kab vāpsī kā rāsta rahne diyā

donoñ ke dil meñ ḳhauf thā maidān-e-jañg meñ
donoñ kā ḳhauf fāsla thā darmiyān kā

roz maidān-e-jañg bantā huuñ
mujh meñ ābād haiñ qabā.il kyā

chhupte phirte haiñ vaqt-e-jañg-o-jadal
buzdilā un ko barmalā kahiye

bādshāh mar chukā hai
vāresīn aa.eñ ab ba-sad-ḳhulūs jañg ho

yaad kar lenā bahattar kī kahānī 'bāqī'
jañg chhiḌ jaa.e kisī vaqt agar paanī kī

kuchh jiit meñ bhī fā.eda hotā nahīñ phir bhī
vo jañg nahīñ hārtā harjāne ke Dar se

dāman ko tere thaam ke rāhat baḌī milī
ab tak maiñ apne aap se masrūf-e-jañg thā

hameñ to apne usūloñ kī jañg jītnī hai
kise ġharaz, jo koī fat.h ke sile hue bhī

na.iiñ dimāġh-e-hijr terā sham.a ke sho.ale kī tarah
khā ga.ī hai mujh ko gir kar mujh se apnī naak jañg