Tags-Yaad

maiñ ne jab vādī-e-ġhurbat meñ qadam rakkhā thā
duur tak yād-e-vatan aa.ī thī samjhāne ko

raat masjid meñ añdherā to bahut thā lekin
yaad bhūlī sī koī rāh-e-ibādat thī mujhe

sukūn-e-dil na mayassar huā zamāne meñ
na yaad rakhne meñ tum ko na bhuul jaane meñ

yaad aatī hai rāhoñ meñ shādābī-e-naḳhlistāñ
phir pā-e-barahna hai pur-ḳhār bayābāñ hai

ab yaad kabhī aa.e to ā.īne se pūchho
'mahbūb-ḳhizāñ' shaam ko ghar kyuuñ nahīñ jaate

umr bhar yuuñ to kabhī lī bhī na karvaT pas-e-marg
haif rah-rah ke kiyā karte haiñ ab yaad mujhe

hukm darbāñ ko hai zinhār na aane paa.e
ġhair ke sāmne karte haiñ magar yaad mujhe

ham-safīroñ ko mirā haal khulegā pas-e-marg
dekhnā dil meñ kareñge vo bahut yaad mujhe

sabz baaġh aatā hai duniyā kā nazar jab 'ra.anā'
yaad aatī hai bahut hasrat-e-shaddād mujhe

yād-dilbar meñ kabhī ai dil-e-muztar tū ne
ham ko chup-chāp kahīñ baiTh ke rone na diyā

vo ab ke jaa.e to phir lauT kar na aa.e kabhī
bhulā.e aise ki phir yaad bhī na aa.uuñ maiñ

ab apnī haqīqat bhī 'saġhar' be-rabt kahānī lagtī hai
duniyā kī haqīqat kyā kahiye kuchh yaad rahī kuchh bhuul ga.e

maiñ apne dil se nikālūñ ḳhayāl kis kis kā
jo tū nahīñ to koī aur yaad aa.e mujhe

markaz-e-jāñ to vahī tū hai magar tere sivā
log haiñ aur bhī is yaad purānī meñ kahīñ

maiñ thā kisī kī yaad thī jām-e-sharāb thā
ye vo nashist thī jo sahar tak jamī rahī

kyā huā ab ki safar meñ ye mujhe yaad nahīñ
mujh se royā thā bahut der lipaT kar koī

ḳhat paḌh ke kahīñ aur bigaḌ baiThe na yārab
yaad aa.ī hai abrū dam-e-tahrīr kisī kī

tumhārī yaad ne kī rahnumā.ī
ḳhayāl aayā mujhe jab be-ḳhudī kā

yaad aatā hai ḳhudā pal pal pal
aisī hālat meñ ibādat kaisī

un kī yaad meñ bahte aañsū ḳhushk agar ho jā.eñge
saat samundar apnī ḳhālī ā.ankhoñ meñ bhar lā.ūñgā