Tags-Yaad

yaad bhī aatā nahīñ kuchh bhūltā bhī kuchh nahīñ
yā bahut masrūf huuñ maiñ yā bahut fursat meñ huuñ

piiTh par bojh shikam kā le kar
ham tirī yaad jagāne nikle

zabān pe nāla-o-fariyād ke sivā kyā hai
hamāre dil meñ tirī yaad ke sivā kyā hai

mire nasīb meñ thā ishq-e-jāvedāñ likkhā
vagarna kyuuñ maiñ tirī yaad ko bachā laayā

yuuñ bhī panāh-e-sāya kaḌī dhuup meñ milī
āñkheñ jhukā.īñ aur tujhe yaad kar liyā

raat ik shaḳhs bahut yaad aayā
jis ghaḌī chāñd numūdār huā

chuTkiyoñ meñ bhuul jā.ūñgī unheñ
ab mujhe vo yaad aa.eñ to sahī

haif hai us ke hone par jo yaad karo tum ġhair ko jaan
'jur.at' meñ jo nahīñ so aisī baat vo kyā hai aur kahīñ

yaad rakhne kī ye bāteñ haiñ bajā hai sach hai
aap bhūle na hameñ aap ko ham bhuul ga.e

shabnam-ālūd palak yaad aa.ī
gul-e-āriz kī jhalak yaad aa.ī

phir sulagne lage yādoñ ke khañDar
phir koī tāk-e-ḳhunak yaad aa.ī

kabhī zulfoñ kī ghaTā ne gherā
kabhī āñkhoñ kī chamak yaad aa.ī

phir kisī dhyān ne Dere Daale
koī āvāra mahak yaad aa.ī

phir koī naġhma gulū-gīr huā
koī be-nām kasak yaad aa.ī

zarre phir mā.il-e-ram haiñ 'nāsir'
phir unheñ sair-e-falak yaad aa.ī

DhūñDoge agar mulkoñ mulkoñ milne ke nahīñ nāyāb haiñ ham
jo yaad na aa.e bhuul ke phir ai ham-nafaso vo ḳhvāb haiñ ham

pahlī pahlī vo mulāqāt vo barsāt kī raat
yaad hai yaad hai vo sharm-o-hijābāt kī raat

yaad kartā rahā kisī ko koī
phuul dil meñ khilā hamesha se

yād-e-ahbāb kī ḳhushbū se mahaktī shāmeñ
kuchh kaho hotī haiñ kambaḳht dil-āzār bahut

dil kī raftār badal jaatī thī āvāz ke saath
yaad aatā hai vo pairāya-e-guftār bahut