Tags-Yaad

yaad aa.e jo tire teġh kā maalā qātil
roke paidā kare motī kī laḌī merī aañkh

bāġhbāñ nahr nahīñ yaad meñ ik kūche kī
ro rahī hai ye gulistāñ meñ paḌī merī aañkh

yaad aate haiñ mujhe hazrat-e-'nāsiḳh' jo 'vazīr'
kyā lagā detī hai ashkoñ kī jhaḌī merī aañkh

kyā kahūñ 'mīr' farāmosh kiyā un ne tujhe
maiñ to taqrīb bhī kī par tū use yaad nahīñ

allāh kare jahāñ ko mirī yaad bhuul jaa.e
allāh kare ki tum kabhī aisā na kar sako

kah de man kī baat to gorī kaahe ko sharmātī hai
shaam Dhale tujh ko kis aprādhī kī yaad satātī hai

rañg lā.egī mirī āh-e-rasā mere ba.ad
tum mujhe yaad karoge ba-ḳhudā mere ba.ad

kyuuñ nadāmat se tah-e-ḳhāk gaḌā jaatā huuñ
tum ne kis dil se mujhe yaad kiyā mere ba.ad

jis ne terī yaad meñ sajde kiye the ḳhaak par
us ke qadmoñ ke nishāñ paa.e ga.e aflāk par

kabhī bhūle se bhī ab yaad bhī aatī nahīñ jin kī
vahī qisse zamāne ko sunānā chāhte haiñ ham

shakl ban jā.ūñgā bādal meñ kabhī purvā meñ ubhar jā.ūñgā
maiñ kisī yaad kā jhoñkā ban kar tere āñgan se guzar jā.ūñgā

vo bhī ab yaad kareñ kis ko manāne nikle
ham bhī yūñhī to na maane the siyāne nikle

vo aa.e haiñ yaad shām-e-hasrat
yā koī charāġh jal gayā hai

sayyād-e-gul-ezār dikhātā hai sair-e-bāġh
bulbul qafas meñ yaad kare āshiyāna kyā

ai dil tirī aahoñ meñ itnā to asar aa.e
jab yaad karūñ un kī tasvīr nazar aa.e

ik sivā tere mujhe yaad na aa.e kuchh bhī
is qadar ishq meñ dīvāna banā do mujh ko

chalā.īñ goliyāñ jis par munāfiqoñ ne 'shabāb'
saf-e-namāz meñ yād-e-ḳhudā meñ baiThā thā

jaane kis kī thī ḳhatā yaad nahīñ
ham hue kaise judā yaad nahīñ

ek sho.ala sā uThā thā dil meñ
jaane kis kī thī sadā yaad nahīñ

ek naġhma sā sunā thā maiñ ne
kaun thā sho.ala-navā yaad nahīñ