Tags-Yaad

maiñ faqat ek ḳhvāb thā terā
ḳhvāb ko kaun yaad rakhtā hai

tirī talāsh ko niklūñgā is se pahle magar
maiñ terī yaad ke sahrā meñ ḳhud ko DhūñD to luuñ

āvāz kā us kī zer-o-bam kuchh yaad rahā kuchh bhuul ga.e
kitnā dilkash thā merā sanam kuchh yaad rahā kuchh bhuul ga.e

kis darja hasīñ thā vo lamha jo qissa-e-pārīna hai ab
jab us kī nazar meñ the bas ham kuchh yaad rahā kuchh bhuul ga.e

go aise lamhe kam aa.e lekin haiñ vo merā sarmāya
kab kab vo huā mā.il-ba-karam kuchh yaad rahā kuchh bhuul ga.e

vo rūThne aur manāne kā ehsās abhī tak baaqī hai
kyā kyā the us ke qaul-o-qasam kuchh yaad rahā kuchh bhuul ga.e

vo ḳhvāb dikhātā thā mujh ko maiñ is pe bharosa kartā thā
qaa.im na rahā va.adoñ kā bharam kuchh yaad rahā kuchh bhuul ga.e

aa.e ho abhī jaate ho kahāñ is kā ye kahnā abhī aayā
kar denā mirī phir naak meñ dam kuchh yaad rahā kuchh bhuul ga.e

ye bhūlī-bisrī yādeñ haiñ sarmāya-e-zīst mirā 'barqī'
kis tarah karūñ meñ is ko raqam kuchh yaad rahā kuchh bhuul ga.e

aap sharmā ke na farmā.eñ hameñ yaad nahīñ
ġhair kā zikr hai ye aap kī rūdād nahīñ

kahāñ ke naale kahāñ kī aaheñ jamī haiñ un kī taraf nigāheñ
kuchh is qadar mahv-e-yād huuñ maiñ ki fursat-e-yak-nafas nahīñ hai

nāseh nasīhateñ ye kahāñ yaad rahtī haiñ
hazrat abhī kisī se tabī.at lagī nahīñ

kar 'hātim' yaad ahvāl-e-shahīdāñ
shafaq se jab ki hotā hai gagan surḳh

kisī kī yaad meñ aañsū jo aañkh se Tapke
javāharāt haiñ ye āshiqī ke dāman meñ

dil hai ki tirī yaad se ḳhālī nahīñ rahtā
shāyad hī kabhī maiñ ne tujhe yaad kiyā ho

tum ruuTh chuke dil TuuT chukā ab yaad na aao rahne do
is mahfil-e-ġham meñ aane kī zahmat na uThāo rahne do

vo kahte haiñ har choT par muskurāo
vafā yaad rakkho sitam bhuul jaao

yuuñ bhī lagtā hai tirī yaad bahut hai lekin
zaḳhm ye dil ke tirī yaad se bharte kab haiñ

rah rah ke vo chehra mujhe yaad aatā hai 'sāqib'
dekhā nahīñ jī bhar ke use kaun thā kyā thā

koī sar-gashta yaad aa hī gayā
teġh us kī jo saan tak pahuñchī