Tags-Zindagi

zindagī kā muqaddar safar-dar-safar
āḳhirī saañs tak be-qarār aadmī

apnā nafas nafas hai ki sho.ala kaheñ jise
vo zindagī hai aag kā dariyā kaheñ jise

suntā huuñ maiñ sadā.eñ ye ashkoñ kī jhiil se
ab zindagī guzār to sabr-e-jamīl se

bahut hasīñ hai jahāñ, zindagī bhī ḳhuub magar
mazīd bār-e-nafas Dho nahīñ sakūñgā maiñ

baat jiine kī adā tak ḳhūb-sūrat hai magar
zindagī kuchh aur hai is zindagī se māvarā

jamāl-e-marg-āfrīñ! ye shab merī zindagī hai
nichoḌ de is ke chand lamhoñ kī ishratoñ meñ

zindagī bhī hai ek marg-e-davām
tum jo jiine kā haq adā na karo

zindagī dene lagī parhez-gārī kā sabaq
ab to ham jaise bhī sabzī daal khāne lag ga.e

kabhī kabhī kā ho qissa to koī dukh bhī sune
uThā.e bojh bhalā kaun zindagī-bhar kā

bigaḌtī baat hai jab jab mujhe yuuñ kostī ho tum
ki jaise zindagī kā har sitam mujh se hī paayā ho

maiñ zindagī kī sadā aag bhī huuñ shabnam bhī
mire dukhoñ ko samajh yuuñ mujhe javāb na de

har qadam hādse har nafs talḳhiyāñ
zindagī barq tūfāñ ḳhizāñ āñdhiyāñ

dil jis kā nahīñ harf-e-mohabbat se shanāsā
vo zindagī vīrān mazāroñ kī tarah hai

hādsoñ hī meñ zindagī jī hai
ham ne qistoñ meñ ḳhud-kushī kī hai

ḳhvāboñ par iḳhtiyār na yādoñ pe zor hai
kab zindagī guzārī hai apne hisāb meñ

na hai hasīnoñ meñ kaj-adā.ī na zindagī meñ koī burā.ī
hai nekiyoñ hī kā ghar ḳhudā.ī agar tū ḳhud ḳhud-nigar hai pyāre

haiñ tere ash.ār 'arsh' aise rumūz hoñ zindagī ke jaise
tujhe na deñ log daad kaise baḌā hī tū nukta-var hai pyāre

tū ne ġham de ke mujhe daulat-e-duniyā de dī
zindagī aisī kahāñ thī tire ġham se pahle

ek ek kar ke jitne hunar the vo chhin ga.e
ham zindagī se kyuuñ na hoñ bezār āj-kal

zindagī ko bhī sila kahte haiñ kahne vaale
jiine vaale to gunāhoñ kī sazā kahte haiñ