Tags-Zindagi

mohabbat zindagī hai
mohabbat dil kī tiira sā.atoñ meñ raushnī hai

ġham kī band muTThī meñ ret sā mirā jīvan
jab zarā kasī muTThī zindagī bikhartī hai

zindagī meñ lag chukā thā ġham kā sarmāya bahut
is liye shāyad kamāyā ham ne kam paayā bahut

tanhā.ī zindagī kī kaThin ho ga.ī thī yaar
lams-o-surūr baḳhsh ke masrūr kar diyā

zindagī se kyuuñ na ho nafrat ki mahv-e-zulf huuñ
qaid-e-hastī mujh ko 'bedam' kam nahīñ zanjīr se

ajab hī dushman se dostī kī ki shakl ab hai ye zindagī kī
laboñ pe chakkī hai jāñ-kanī kī paḌe haiñ behosh nīm-jāñ se

mizāj-e-shauq meñ māmūriyat kā azm bhī ho
faqat sukūn nahīñ zindagī meñ razm bhī ho

raushnī laTkī huī talvār sī
husn-afzā zindagī ḳhūñ-ḳhvār sī

sāmne sad-rañg nusḳhe, mashvare
zindagī sadiyoñ se kuchh bīmār sī

ye ḳhayāl thā kabhī ḳhvāb meñ tujhe dekhte
kabhī zindagī kī kitāb meñ tujhe dekhte

ye zindagī hai 'qamar' yā ki jañgaloñ kā safar
har ek lamha yahāñ rāh-e-pur-ḳhatar meñ rahe

maujzan hai qatra-e-shabnam meñ sail-e-zindagī
zarra-e-kamtar hai mehvar mehr-e-pur-tanvīr kā

vo gale mil ke kyā hue ruḳhsat
zindagī jān-e-zindagī na rahī

savāl hai ġham-e-hastī ke biit jaane kā
ye zindagī to bahar-hāl biit jaatī hai

maiñ apnī aag meñ jal kar kabhī kā ḳhaak huā
ye zindagī mujhe kyā ḳhaak meñ milātī hai

chhoḌ de ai dil tamannā zindagī kī chhoḌ de
tū halāk-e-gardish-e-ayyām hotā jā.egā

zindagī hai jis kuuñ daa.im ālam-e-bāqī munīñ
jalva-gar kab us añge yū ālam-e-fānī huā

sub.h-e-hijrāñ bad-tar-az-shab-hā-e-hijrāñ haa.e haa.e
zindagī ik mustaqil ḳhvāb-e-pareshāñ haa.e haa.e

talḳhī-e-hālāt-e-daurāñ kā bayāñ hai zindagī
dard-o-ġham kī ik musalsal dāstāñ hai zindagī

allāh allāh ye safar ye raah ye dushvāriyāñ
vaqt ke shānoñ pe ik bār-e-girāñ hai zindagī