Tags-Zindagi

ab zindagī kā koī sahārā nahīñ rahā
sab ġhair haiñ koī bhī hamārā nahīñ rahā

ye zindagī kī sitam-zarīfī nahīñ to phir aur kyā hai 'āzar'
vo jin kī ḳhātir bhaTak rahe haiñ unhī ne ham ko bhulā diyā hai

isī hujūm meñ laḌ-bhiḌ ke zindagī kar lo
rahā na jā.egā duniyā se duur jā kar bhī

ḳhvāhishoñ ke hujūm the lekin
apne hisse meñ zindagī kam thī

ġham-e-daurāñ se bachnā zindagī meñ ġhair-mumkin hai
ġham-e-jānāñ ko siine se lagā le jis kā jī chāhe

'shajī.a' is zindagī meñ ham talabgār-e-mohabbat haiñ
mohabbat se hameñ apnā banā le jis kā jī chāhe

zindagī sach kī himāyat nahīñ karne detī
aisī koī bhī ibādat nahīñ karne detī

abhī bahut rañg haiñ jo tum ne nahīñ chhue haiñ
kabhī yahāñ aa ke gaañv kī zindagī to dekho

zindagī tiira ġhaar ke mānind
aur maiñ raushnī kā shaidā.ī

zindagī kahtī hai armāñ koī ab hai na ummīd
kab talak saath karūñ maiñ tan-e-tanhā terā

ḳhushī kī bhī ḳhabar se ab to dilchaspī nahīñ mujh ko
ki ab ai zindagī tujh se vafā achchhī nahīñ lagtī

mez par nanhā sā ik kāġhaz kā TukḌā chhoḌ kar
zindagī kī har ḳhushī vo nā-gahānī le gayā

kitnī begāngī se dekhte ho
jab ġham-e-zindagī kī baat aa.ī

zindagī miltī jo sau baar hameñ duniyā meñ
ham to har baat ise aap pe vaarā karte

ashkoñ se bun ke marsiya pahnā diyā gayā
ab zindagī ke tan pe ġhazal kā libās ho

sab ko miT jaanā hai taqvīm-e-fanā kyā dekhūñ
zindagī kyuuñ na tirā husn-e-dil-ārā dekhūñ

zindagī koī ma.ānī koī matlab to ho
ye na ho qāfila-e-jāñ kā guzarnā dekhūñ

ye jam.a o ḳharch zabānī hai naqd-e-sher-o-suḳhan
magar yahī to kamā.ī hai zindagī bhar kī

zindagī de ke musībat meñ hameñ Daal diyā
koī yuuñ bhī kahīñ be-jurm sazā detā hai

dāstān-e-zindagī kī jab kiran ḳhāmosh thī
tab havā bhī sun ke chup saarā fasāna rah ga.ī