Tags-Zindagi

judā.iyoñ ke zaḳhm dard-e-zindagī ne bhar diye
tujhe bhī niiñd aa ga.ī mujhe bhī sabr aa gayā

kis muñh se zindagī ko vo raḳhshanda kah sakeñ
jo mehr-o-māh ko bhī na tābinda kah sakeñ

jī rahā huuñ is e'timād ke saath
zindagī ko mirī zarūrat hai

us kī mahfil meñ baiTh kar dekho
zindagī kitnī ḳhūb-sūrat hai

ham apnī zindagī ko ḳhud se duur le ke jā.eñge
ki phūTne hī vaalā hai ḳhalā kā ye habāb ab

zindagī meñ abhī ḳhushiyāñ bhī haiñ ra.anā.ī bhī
zindagī se abhī dāman na chhuḌā maan bhī jā

yūñhī gar har saañs meñ thoḌī kamī ho jā.egī
ḳhatm rafta rafta ik din zindagī ho jā.egī

marg-e-be-hañgām kahte haiñ jise aaj ahl-e-dard
kal yahī sūrat badal kar zindagī ho jā.egī

na rūdād-e-hubāb-e-zindagī pūchh
ḳhirām-e-āb-jū ne maar Daalā

kuchh aise dard bhī haiñ zindagī kī rāhoñ meñ
jahāñ hijāb-e-tabassum bhī kaam aa na sake

kis darja dil-shikan the mohabbat ke hādse
ham zindagī meñ phir koī armāñ na kar sake

be-ḳhayālī meñ kahā thā ki shanāsā.ī nahīñ
zindagī ruuTh ga.ī lauT ke phir aa.ī nahīñ

qadam qadam pe kaasa le ke zindagī thī raah meñ
so jo bhī apne paas thā nikāl kar diyā gayā

is zindagī meñ itnī farāġhat kise nasīb
itnā na yaad aa ki tujhe bhuul jaa.eñ ham

use bhuul jā.ūñ ye kah ke maiñ vo mirā nahīñ thā nahīñ nahīñ
mujhe de ke jo na.ī zindagī mirī zindagī se nikal gayā

kabhī to aa.e vo ai zindagī mirā ban kar
qasam ḳhudā kī maiñ rāhoñ ko bhī sajā.ūñgī

āḳhirī vaqt hai āḳhirī saañs hai zindagī kī hai shaam āḳhirī āḳhirī
sañg-dil aa bhī jā ab ḳhudā ke liye lab pe hai terā naam āḳhirī āḳhirī

jīte-jī qadr merī kisī ne na kī zindagī bhī mirī bevafā ho ga.ī
duniyā vaalo mubārak ye duniyā tumheñ kar chale ham salām āḳhirī āḳhirī

jhuuT kyuuñ boleñ faroġh-e-maslahat ke naam par
zindagī pyārī sahī lekin hameñ marnā to hai

mirī mohabbat meñ saarī duniyā ko ik khilaunā banā diyā hai
ye zindagī ban ga.ī hai maañ aur mujh ko bachcha banā diyā hai