Tags-Zindagi

ai 'sarosh' mat pūchho merī kyā haqīqat hai
zindagī ke sahrā meñ dard kā shajar tanhā

yā karo apnā kisī ko yā kisī ke ho raho
chaar din kī zindagī meñ lutf-e-tanhā.ī nahīñ

tere milne se ham ko ḳhushī mil ga.ī
yuuñ lagā ik na.ī zindagī mil ga.ī

aap ke dam se hai zindagī zindagī
aap kyā mil ga.e zindagī mil ga.ī

ġharīb maaoñ sharīf bahnoñ ko aman-o-izzat kī zindagī de
jinheñ atā kī hai tū ne tāqat unheñ hidāyat kī raushnī de

zindagī kyā hai anāsir meñ zuhūr-e-tartīb
maut kyā hai inhīñ ajzā kā pareshāñ honā

maiñ kitāb-e-zindagī kā ek lafz-e-mustaqil
vaqt ne tashrīh kī to hāshiyoñ meñ baT gayā

mar ke bhī yādoñ meñ jiinā chāhtā hai aadmī
aadmī kī zindagī ko imtihāñ honā hī thā

ḳhvāb ban kar har ḳhushī rah jā.egī
bin tire kyā zindagī rah jā.egī

jo mil ke chhūT ga.e zindagī kī rāhoñ meñ
ab un hasīn sahāroñ kī yaad aatī hai

ye soch kar ki añdhere na zindagī ban jaa.eñ
jahāñ jahāñ mile shams-o-qamar sameT liye

hamārī zindagī-o-maut kī ho tum raunaq
charāġh-e-bazm bhī ho aur charāġh-e-fan bhī ho

maut bhartī jā rahī hai apne rañg
zindagī miTtī huī tasvīr hai

kuchh nahīñ badlā tumhāre ba.ad bhī
zindagī tasvīr thī tasvīr hai

aise jiine se maut behtar hai
zindagī zindagī agar na huī

koī chāhe luuTe maze yaañ ke yaañ
mujhe zindagī marg yaarī lage

nāfa-e-āhu-e-tatār zaḳhm-e-numūd kā shikār
dasht se zindagī kī rau ek misāl le ga.ī

aisā ho zindagī meñ koī ḳhvāb hī na ho
añdhiyārī raat meñ koī mahtāb hī na ho

zindagī bhaTkā huā jañgal hai
raah bechain shajar āvāra

raat tāroñ se jab sañvartī hai
ik na.ī zindagī ubhartī hai