Tags-Zindagi

mire ġham-ḳhvār mire dost tumheñ kyā ma.alūm
zindagī maut ke mānind guzārī maiñ ne

'ziyā' vo zindagī kyā zindagī hai
jise ḳhud maut bhī Thukrā ga.ī ho

chal paḌī hai ajal kī rāhoñ par
zindagī be-ḳhabar savārī hai

dhīme suroñ meñ chheḌ ke phir sāz-e-zindagī
tū mere lahje meñ bhī kabhī mujh se baat kar

rahegā aql ke siine pe tā-abad ye daaġh
ki zindagī ne bhī paayā na zindagī kā surāġh

hai jiine vāloñ kī ḳhātir ye kaisī majbūrī
na zindagī kā farāġh aur na zindagī se farāġh

zindagī jitnī bhī hai ab mustaqil sahrā meñ hai
aur is sahrā meñ terā duur tak saayā nahīñ

zindagī ke vo kisī moḌ pe gaahe gaahe
mil to jaate haiñ mulāqāt kahāñ hotī hai

zindagī meñ pahle itnī to pareshānī na thī
tañg-dāmānī thī lekin chāk-dāmānī na thī

'zākir' ye zindagī kī haqīqat sarāb hai
jab āgahī milī to yahī tajraba huā

dil ke māroñ se dil-lagī chāhe
maut qistoñ meñ zindagī chāhe

suno sar-phiro mire hāsīdo mirī zindagī kā hai raaz kyā
mirā sar kahīñ bhī jhuke to kyuuñ mirā dil kisī kā ġhulām hai

is dafa to zindagī jaldī meñ thī
kah do aglī baar fursat meñ mile

ik inqalāb-e-musalsal hai zindagī merī
ik iztirāb-e-mukammal hai ḳhāmushī merī

tirī nigāh ne kyā de ke shād-kām kiyā
ki be-niyāz-e-tamannā hai zindagī merī

kyā sochiye ki soch se aage hai zindagī
pahre lagā rakhe haiñ kisī ne hayāt par

tere baġhair lagtā hai goyā ye zindagī
tanqīd kar rahī hai mirī ḳhvāhishāt par

zindagī apne rog se hai tabāh
aur darmāñ kī kuchh sabīl nahīñ

tum bahut jāzib-o-jamīl sahī
zindagī jāzib-o-jamīl nahīñ

rañg-e-harf-e-sadā kī duniyā meñ
zindagī qatl ho ga.ī hai kahīñ