Tags-Zindan

jis ko dekho vahī zanjīr-ba-pā lagtā hai
shahr kā shahr huā dāḳhil-e-zindāñ jānāñ

aate haiñ saare rāste muḌ kar yahīñ 'shakīl'
zindāñ mirā yahī thā isī ghar meñ qaid thā

gar duur talak baab ke imkān nahīñ haiñ
dīvār meñ ik rauzan-e-zindāñ ko nikālo

mere hī dam se hai ābād junūñ-ḳhāna-e-ishq
maiñ na huuñ qaid to barbādi-e-zindāñ ho jaa.e

ghar jo zindāñ hai to vīrāna banā detā thā
dar-o-dīvār takā karte ho kyā karte ho

zindāñ meñ shahīdoñ kā vo sardār aayā
shaidā-e-vatan paikar-e-īsār aayā

qaid-e-hastī meñ ye ik gosha-e-dāmān-e-ḳhayāl
phir ġhanīmat hai ki zindāñ meñ bhī āzād to huuñ

nahīñ Darte agar hoñ laakh zindāñ yaar zindāñ se
junūn ab to misāl-e-nāla-e-zanjīr ham nikle

chhoḌ māvā-e-zaqan zulf-e-pareshāñ meñ phañsā
misl-e-yūsuf maiñ nikal chaah se zindāñ meñ phañsā

kyā ajab hote haiñ bātin rāstoñ ke silsile
koī bhī zindāñ ho 'bānī' raushnī dar aa.egī

kab tak maiñ zindāñ meñ baiThā
aane vaale kal ko musht-e-ḳhāk samajh kar

pā-e-kūbāñ koī zindāñ meñ nayā hai majnūñ
aatī āvāz-e-salāsil kabhī aisī to na thī

phuul gulshan meñ jigar-chāk nazar aate haiñ
sarv ke saa.e pe zindāñ kā gumāñ guzrā hai

laakh vīrān sahī gosha-e-zindāñ lekin
ham to tere lab-o-ruḳhsār uThā laa.e haiñ

mere andar jo sar-phirā hai use
maiñ ne zindāñ meñ Daal rakkhā hai

āvārgī ko vus.at-e-sahrā bhī kam rahī
dil ko jahān-e-shauq bhī zindāñ se kam na thā

hamāre dil se kyā armān sab ik saath nikleñge
ki qaidī muḳhtalif mī.ād ke hote haiñ zindāñ meñ

kahā ye ishq se dār-o-salīb-e-zindāñ ne
majāl ho to mirī raah iḳhtiyār na kar

aisā dil-kash thā ki thī maut bhī manzūr hameñ
ham ne jis jurm kī kaaTī hai sazā zindāñ meñ

ye vo zabāñ hai ki jis ne zindāñ kī tīrgī meñ diye jalā.e
ye vo zabāñ hai ki jis ke sho.aloñ se jal ga.e phāñsiyoñ ke saa.e