Tags-Zulf

koī zulf ko kahe zulf kākul ko samjhe kākul
apnī nazar meñ to haiñ mār-e-siyāh donoñ

kiyā hai zulf-o-ruḳh-o-chashm ne jo sar-gashta
nikal ke ghar se mirā dil tirāhe meñ bhaTkā

'jālib' tamām umr hameñ ye gumāñ rahā
us zulf ke ḳhayāl se āzād ham hue

nik.hat-e-zulf se masrūr huā ḳhuub huā
saañp ke zahr se maḳhmūr huā ḳhuub huā

dil tirī zulf dekh kyuuñ na Dare
jaal ho hai shikār kā dushman

saath achraj hai zulf o shāne kā
mor hotā hai maar kā dushman

zulf-e-jānāñ meñ nahīñ koī dil-e-vahshī asiir
ye ajab tātār hai jo ek bhī aahū nahīñ

zulf lahrā ke mire dil meñ zarā
ḳhvāhishoñ kā ek tūfāñ dekhnā

ye kaisī bād-e-bahār hai jis meñ shāḳh-e-urdu na phal sakegī
vo kaisā rū-e-nigār hogā na zulf jis par machal sakegī

chāñd kis mah-jabīñ kā partav hai
raat kis zulf kī hikāyat hai

kaun se ye bahr-e-ḳhūbī kī pareshāñ zulf hai
aatī hai āñkhoñ meñ merī mauj dariyā-āshnā

mū-ba-mū us kuuñ hai pareshānī
zulf-e-mushkīñ kā jis kuuñ saudā hai

yaar ham se siyāh-baḳhtoñ kī
zulf tak kab rasā.ī hotī hai

savād-e-shab meñ ik āvāz par huuñ garm-e-safar
asīr-e-zulf na āvāra-e-bahār huuñ maiñ

hamārī chhātī pe phirtā hai saañp yaañ 'ehsāñ'
vahāñ hai shaġhl use zulf ke banāne kā

zanjīr kī sadā thī na mauj-e-shamīm-e-zulf
ye kyā tilism un ke mire fāsle meñ thā

mujhe kyā agar tire dosh se tirī zulf tā-ba-kamar huī
ki maiñ aisā ḳhāna-ḳharāb huuñ kabhī chhāñv meñ na basar huī

hijr kī rātoñ meñ lāzim hai bayān-e-zulf-e-yār
niiñd to jaatī rahī hai qissa-ḳhvānī kījiye

jhuk paḌe hai terī pā-bosī kā
zulf bhī shauq-e-balā rakhtī hai

aah merī hai asar se ham-dosh
tāl-e-zulf-e-rasā rakhtī hai