Tags-Zulf

bhavāñ shamshīr haiñ o zulf phāñsī
har ik palak us kī mānind-e-sināñ hai

kholī thī ḳhvāb-e-nāz se kis ne ye uTh ke zulf
laatī hai bū-e-nāz nasīm-e-sahar hanūz

jis samt nazar mauj-e-sarāb aave to ye jaan
hovegī kisī zulf-e-chalīpā kī nishānī

mohabbat zulf kā aaseb jaadū hai nigāhoñ kā
mohabbat fitna-e-mahshar balā-e-nā-gahānī hai

kahīñ maġhz us ke maiñ sub.h-dam tirī bū-e-zulf-e-rasā ga.ī
tire kūche se jo chaman talak gul uḌātī ḳhāk-e-sabā ga.ī

jis vaqt nazar aayā tirī zulf kā saaya
us vaqt kahā dil ne yahāñ chhāñv ghanī hai

qābil-e-dīd hai mashshātgī-e-fasl-e-bahār
zulf-e-sumbul meñ nayā husn nazar aatā hai

ambar-o-mushk meñ kahāñ ḳhushbū
ai sabā zulf-e-yār kī mānind

niiñd sī aane lagī zulf ke saa.e meñ mujhe
phir mire ḳhvāboñ pe taptā huā sahrā rakh do

mashshātgī-e-falsafa-e-maġhribī na pūchh
zulf-e-ḳhayāl aur pareshāñ hai āj-kal

aap ke ruḳh se barastā hai sahar kā joban
aap kī zulf ke saa.e meñ ghaTā aatī hai

zulf us kī apne haq meñ dekhiye kahtī hī kyā
hai hamārā faisla ab to zabān-e-mār par

khol dī hai zulf kis ne phuul se ruḳhsār par
chhā ga.ī kaalī ghaTā sī aan kar gulzār par

kabhī dast-e-zulf se the baham kabhī ruḳh ke lete the bose ham
shab-o-roz ab to hai dard-o-ġham kabhī vuuñ bhī lail-o-nahār thā

zulf-e-shab-gūñ tire shāne pe khulī nāgin hai
Das le ye jis ko na phir uTh ke vo paanī māñge

mujh par nigāh-e-gardish-e-daurāñ nahīñ rahī
shāyad kisī kī zulf-e-pareshāñ nahīñ rahī

kisī kī zulf kā saaya talāsh kar varna
'asar' guzar na sakegī ye zindagī tanhā

rāhoñ meñ zindagī kī luTī sab matā-e-hosh
uljhāo un kā zulf-e-pareshāñ se kam na thā

chāñd nikhrā hai tirī lauh-e-jabīñ kī sūrat
raat bikhrī hai tirī zulf-e-pareshāñ kī tarah

chāñd us kā āsmāñ us kā sar-e-shām-e-visāl
jis pe saaya ho tirī zulf-e-sitāra-gīr kā