Tags-Zulf

niklegī bū-e-zulf hamārī talāsh meñ
sahrā meñ ab havā-e-gulistāñ bhī aa.egī

zulf kī ghaTā khulī abhī
haa.e mahtāb ho ga.ī

ai yaar dekh zulf-e-mo.ambar na khol tū
aage hī dil hai apnā pareshān jā.iye

qāfile jaane ghaTāoñ ke kahāñ utreñge
har ḳham-e-zulf ba-hasrat-nigarāñ hai ki nahīñ

kamand zulf kī laTkā ke us sanam ne 'nazīr'
chaḌhā liyā mujhe apne nidān koThe par

gardish-e-baḳht se baḌhtī hī chalī jaatī haiñ
mirī dil-bastagiyāñ zulf-e-girah-gīr ke saath

firāq-e-lab-o-zulf par munhasir kam hī paa.ī hai ahl-e-vafā kī taḌap
tum āġhosh ke tañg halqe meñ ho phir bhī har lamha afzūñ hai dil kī jalan

asīr-e-zulf hai 'mahrūm' un kā
jinheñ aatā nahīñ āzād karnā

aañsū bahne lage dekhte hī
zulf-e-mahbūb hai yā dhuāñ hai

kyuuñ dil-e-betāb ko dikhlāyā ḳhāl-e-zer-e-zulf
daam meñ machhlī nahīñ aane kī daane ke liye

pahuñchī hai shāne talak kyā yaar kī zulf-e-rasā
dard kyuuñ paidā huā hai mere shāne ke liye

saaya paḌ jaa.e agar zulf-e-darāz-e-yār kā
phir kahūñ maiñ bhī tasalsul hai zamāne ke liye

sarzamīñ zulf kī jāgīr meñ thī is dil kī
varna ik daam kā phir us meñ Thikānā kyā thā

kamand-e-zulf-e-rasā se baare bache to mizhgāñ ne tiir maare
ġhazab hai pesh-e-nazar tumhāre jo koī aayā shikār aayā

tujh zulf meñ dil ne gum kiyā raah
is paihamm galī kuuñ intihā na.iiñ

fursat is vaqt ġhanīmat hai nikal zulmat se
suljh kar zulf se ruḳhsār-e-daraḳhshān meñ aa