Tags-Zulf

yuuñ kahā ham leñge bosa ab to chhū kar zulf ko
bolā muñh kyā dast-gah kyā taab kyā maqdūr kyā

rañg dukānoñ kī ra.anā.ī ḳhushbū dargāhoñ kī zīnat
zulf-e-mo.ambar ab ban ambar sej suhāg se uud gayā

ham na duniyā ke haiñ na diiñ ke haiñ
ham to ik zulf-e-ambarīñ ke haiñ

kahte haiñ tirī zulf kuuñ dekh ahl-e-sharī.at
qurbān hai is kufr par īmān hamārā

tā na mahsūs ho vāmāndagi-e-rāh-e-darāz
zulf-e-ḳhūbāñ kā sunāte hue afsāna chaleñ

mujhe bahr-e-ḳhudā kahīñ us se chhuḌā tire hijr kī shab hai ye kaalī balā
nahīñ jhuuT maiñ kahtā kuchh is meñ zarā mujhe terī hī zulf-e-dotā kī qasam

baam par aa kar zarā bikhrā.iye zulf-e-darāz
phail jaa.e saare aalam meñ savād-e-shām-e-ishq

dil ki tapte hue sahrā kā hai rahrav pyāre
phir tirī zulf se ik shaam suhānī māñge

tumhārī zulf kī uljhan meñ phañs kar niiñd kho baiThe
kabhī sote nahīñ ḳhvāb-e-pareshāñ dekhne vaale

qurbān ho rahī hai mirī jaañ idhar-udhar
vaañ rah pe hai jo zulf-e-pareshāñ idhar-udhar

terī añkhiyāñ ke tasavvur meñ sadā mastāna huuñ
dekh kar zanjīr tere zulf kī dīvāna huuñ

shānoñ pe bal paḌe hue zulf-e-siyāh ke
rādhā se baar baar ishāre nigāh ke

sab ke jaisī na banā zulf ki ham sāda-nigāh
tere dhoke meñ kisī aur ke shāne lag jaa.eñ

qātil to us kā har sar-e-mū bāl-pan se thā
ārā.ish us kī zulf ko shāne ne kyā kiyā

zāhid ne ibādat chhoḌ us zulf se uljhā hai
tasbīh kī shaiḳhī ga.ī zunnār kī baarī hai

kaj-ravī is zulf kā hai ḳhāssa
jis tarah hai maar kī raftār kaj

bahut itrā rahī hai raat zulf-e-ambarīñ ban kar
bahut maġhrūr hai nūr-e-sahar rañg-e-jabīñ ban kar

chashm-e-mahzūñ pe na lahrā.ī vo zulf-e-shādāb
ye parī ham se bhī shīshe meñ utārī na ga.ī

tirī jo zulf kā aayā ḳhayāl āñkhoñ meñ
vahīñ khaTakne lagā baal baal āñkhoñ meñ