Tags-Zulf

ḳhaak suljhegī tirī zulf mirī jānib se
kaun juz bād-e-sabā silsila-e-jumbāñ hogā

bikhrā huā huuñ vaqt ke shāne pe gard sā
ik zulf-e-pur-shikan huuñ sañvāre mujhe koī

kāfir banūñgā kufr kā sāmāñ to kījiye
pahle ghanerī zulf pareshāñ to kījiye

likhe the dār-o-rasan jis kisī kī qismat meñ
phir us kī zulf ke saa.e meñ shaam ho na sakī

is taraf bhī koī ḳhushbū se mahaktā jhoñkā
ai sabā tū ne to vo zulf sañvārī hogī

mire dil se lipaTtī zulf bhī to dekhtā koī
sabhī nālāñ haiñ maiñ ne shahr kyuuñ mismār kar Daalā

kushta-e-zulf ke marqad pe tū ai lailā-vash
bed-e-majnūñ hī lagā tā-ki patā yaad rahe

kyā balā gorī gorī rañgat par
zulf kaalī hai aañkh kaalī hai

zulf andher karne vaalī hai
tum ne nāgan balā kī paalī hai

halqa-e-bād-e-sabā tazkira-e-zulf-e-sanam
is meñ kuchh shā.eba-e-zauq-e-junūñ hai ki nahīñ

dil se rah-e-dil-bastagī kab tai ho 'nazīr' aah
vo zulf-e-musalsal jo na ho silsila-e-pā

ham dekheñ kis din husn ai dil us rashk-e-parī kā dekheñge
vo qad vo kamar vo chashm vo lab vo zulf vo mukhḌā dekheñge

us kī shamīm-e-zulf kā kaise ho shukriya adā
jab ki shamīm rañj hai jab ki mashām rañj hai

sahrā-e-junūñ se 'muhib' us zulf kī zanjīr
phir pech meñ le aa.ī mujhe paañv mire paḌ

pūchhī jo us se maiñ dil-e-sad-chāk kī ḳhabar
uljhā ke apnī zulf vo shāne se uTh gayā

uljhā hai paañv yaar kā zulf-e-darāz meñ
lo aap apne daam meñ sayyād aa gayā

zulf o ruḳhsār kā manzar tauba
shaam aur sub.h kī yakjā.ī hai

har taraf dahr meñ thā zulf kī zanjīr kā gul
magar ai josh-e-junūñ silsila-jumbāñ ham the

khol kar zulf-e-musalsal ko paḌhī us ne namāz
ghar meñ allāh ke bhī jaal bichhā kar aayā

haañ kis ke pā-e-dil meñ hai zanjīr-e-āb-o-gil
kah do ki dām-e-zulf meñ aa.e hue haiñ ham