Tags-Zulf

ka.ī chāñd the sar-e-āsmāñ ki chamak chamak ke palaT ga.e
na lahū mire hī jigar meñ thā na tumhārī zulf siyāh thī

na to apne ghar meñ qarār hai na tirī galī meñ qayām hai
tirī zulf o ruḳh kā farefta kahīñ sub.h hai kahīñ shaam hai

jahāñ mahke mahak gayā saarā jahāñ bhalā itr ko bū ye nasīb kahāñ
ba-ḳhudā hī ḳhatā kaheñ mushk-bū ham tirī zulf pe sadqe nisār kiyā

dilbarī Thahrā zabān-e-ḳhalq khulvāne kā naam
ab nahīñ lete parī-rū zulf bikhrāne kā naam

rañg pairāhan kā ḳhushbū zulf lahrāne kā naam
mausam-e-gul hai tumhāre baam par aane kā naam

hai 'azfarī' vo siyah-baḳht saañp kaaTā bhī
paḌī hai zulf kī aa jis ke paañv meñ zanjīr

mujhe ulfat-e-zulf jab se hai 'parvīñ'
batāte haiñ vo josh-e-saudā ziyāda

haTī zulf un ke chehre se magar āhista āhista
ayaañ sūraj huā vaqt-e-sahar āhista āhista

dekh tujh zulf o rū kī ulfat ko
karte haiñ aaj kufr o diiñ iḳhlās

zulf se chashm-o-lab-o-ruḳh se ki tere ġham se
baat ye hai ki dil-o-jāñ ko rihā kis se kareñ

us kī zulf-e-ḳham-ba-ḳham se ab nikalnā hai muhāl
ġhamza-o-nāz-o-adā se aisā uljhāyā mujhe

bas ki mujh haal suuñ ham-sar hai pareshānī meñ
dard kahtī hai mirā zulf tire kaan meñ aa

mauj-e-betābī-e-dil ashk meñ huī jalva-numā
jab basī zulf-e-sanam tab-e-pareshān meñ aa

dil ko chhuTā vahīñ se phañsāyā to zulf meñ
ai ishq tere baat baḌhāne ko ishq hai

āshufta-sar haiñ yaañ dil-e-sad-chāk bhī ka.ī
tanhā na terī zulf se shāne ko ishq hai

zulf bikhrā.e sar-e-shām pareshān haiñ vo
qismateñ auj pe haiñ chāk-garebānoñ kī

safed qalameñ huiiñ to siyah-zulf milī
ab aisī umr meñ ye inqalāb ya.anī tū

zulf tahrīr-e-pareshān-e-taqāzā hai magar
shāna-sāñ mū-ba-zabāñ ḳhāma-e-mānī māñge

shaboñ kī zulf kī rū-e-sahar kī ḳhair manāo
nigār-e-shams urūs-e-qamar kī ḳhair manāo