Tags-Zulf

but-e-ġhuncha-dahan pe nisār huuñ maiñ nahīñ jhuuT kuchh is meñ ḳhudā kī qasam
mirā tā.ir-e-dil isī qaid meñ hai mujhe zulf ke dām-e-balā kī qasam

kabhī vaqt-e-nāz-o-niyāz hai kabhī mahv-e-zulf-e-ayāz hai
magar us pe bhī dil-e-ġhaznavī karam-āshnā-e-nazar nahīñ

sādiq se bas ik aan meñ ho jaave tū kāzib
dikhlā.ūñ agar tujh ko maiñ us zulf kā ḳham sub.h

mahaktī hai zulf-e-siyah us kī har raat
kahīñ us meñ 'ishq' itr-e-shabbū na hove

mohabbat zulf kā aaseb jaadū hai nigāhoñ kā
mohabbat fitna-e-mahshar balā-e-nā-gahānī hai

sanam kī zulf kī lahroñ ke rashk se 'hātim'
nahīñ ye mauj ye hai pech-o-tāb dariyā meñ

jhuum kar jab mire chehre pe vo lahrā.ī thī
tum ne kis naaz se vo zulf sañvārī pāgal

tere saudā.ī ko phir josh huā vahshat kā
qaidī-e-zulf ko phir tauq-o-rasan yaad aayā

ḳhāna-zād-e-zulf haiñ zanjīr se bhāgeñge kyuuñ
haiñ giraftār-e-vafā zindāñ se ghabarāveñge kyā

muñh chāñd us pe zulf-e-rasā sar se paañv tak
kyuuñ loT-poT ho na adā sar se paañv tak

pahuñche na ba-rañg-e-shāna tā zulf
kyā baḳht-e-siyah ne kotāhī kī

jins-e-dil kā tirī us zulf se phirnā ma.alūm
ho ke ḳhat-kash jo bike vo nahīñ saudā phirtā

zulf chhuTtī tire ruḳh par to dil apnā phirtā
ghar ko be-shām nahīñ sub.h kā bhūlā phirtā

'tāhir' jazā-e-himmat-e-ālī hai zulf-e-yār
zulfoñ se khelne ke liye haat chāhiye

ai zulf-e-nāz koī havā-e-fusūñ kā daam
ahl-e-nazar ko sair-e-tilismāt chāhiye

chashm hai turk nigah neza o mizhgāñ tarkash
zulf-e-pur-pech kā har halqa kamāñ hai goyā

dil zulf-o-ruḳh-e-yār meñ 'saudā' na phire kyuuñ
ḳhush aa.e hai us ko shab-e-mahtāb kī gardish

sākin thī mauj zulf ke bahr-e-siyāh meñ
bād-e-sabā ne chheḌ ke tūfāñ banā diyā

usī sanam ke ruḳh o zulf ke tasavvur meñ
hamārī guzre hai lail-o-nahār nām-e-ḳhudā

dil ne mere kiyā hai tauq-e-gulū
zulf-e-gul-rū hai haar kī sūrat