Tags-Badan

ye āñkheñ ye dimāġh ye zaḳhmoñ kā ghar badan
sab mahv-e-ḳhvāb haiñ dil-e-be-tāb ke sivā

aatī hai us kī bū sī mujhe yāsman meñ aaj
dekhī thī jo adā ki sajan ke badan meñ ham

chāñd taare ik diyā aur raat kā komal badan
sub.h-dam bikhre paḌe the chaar sū merī tarah

ye zard pattoñ kī bārish mirā zavāl nahīñ
mire badan pe kisī dūsre kī shaal nahīñ

hisār-e-shab meñ vo tanhā kisī mujāhid sā
koī badan thā jo parchhā.iyoñ se laḌtā rahā

mire vajūd pe ġhālib thā raat ek badan
tamām raat maiñ añgḌā.iyoñ se laḌtā rahā

habāb un ko na samjho yaaro ye uThte paanī meñ haiñ jo har-dam
badan khulā jo kisī kā dekhā khule haiñ ye īda-e-dariyā

ye bhīgī raat ye bhīgā badan ye husn kā aalam
ye sab andāz mil kar do jahāñ ko luuT jā.eñge

tire badan ke na.e zāviye banātā huā
guzar rahā hai koī dā.ere banātā huā

badan ko rauñdne vaalo zamīr zinda hai
jo haq kī pūchh rahe ho to haq adā na huā

jañg-dar-jañg sulagte haiñ sadāoñ ke badan
sabz rātoñ ke siyah ḳhuun se tar hai dāman

banāo saa.e harārat badan meñ jazb karo
ki dhuup sehan meñ kab se yūñhī paḌī huī hai

sharm bhī ik tarah kī chorī hai
vo badan ko churā.e baiThe haiñ

kisī ḳhayāl kī ḳhushbū kisī badan kī mahak
dar-e-qafas pe khaḌī hai sabā payām liye

aao aaj ham donoñ apnā apnā ghar chun leñ
tum navāh-e-dil le lo ḳhitta-e-badan merā

us kī jām-e-jam āñkheñ shīsha-e-badan merā
us kī band muTThī meñ saarā bāñkpan merā

chaak siine kā ġhazab saaf badan motī sā
ek tasvīr sī kurtī kā garebān parī

dāman-kashāñ chalī hai badan se nikal ke ruuh
khiñchte haiñ phailte haiñ jo yuuñ baar baar haath

dil baham pahuñchā badan meñ tab se saarā tan jalā
aa paḌī ye aisī chiñgārī ki pairāhan jalā

kargas-e-ishq nochtā hai badan
husn pāmāl ho gayā hogā