Tags-Badan

jhulse badan ko dekh ke katrā rahā hai vo
jis ke maiñ ghar kī aag bujhāne meñ jal gayā

ye tā.ir-e-nafas bhī to vāpas na aa.egā
jab chhoḌ kar badan ke qafas se nikal gayā

kal raat jagmagātā huā chāñd dekh kar
saa.e nikal paḌe the badan se idhar udhar

itnī tāzīm huī shahr meñ uryānī kī
raat āñkhoñ ne bhī jī bhar ke badan-ḳhvānī kī

na jaane kitne badan vo pahan ke leTā hai
bahut qarīb hai phir bhī chhupā chhupā sā hai

badan meñ jāma-e-zar-kash sarāpā jis pe zeb-āvar
kaḌe bunde chhaḌe chhalle añgūThī nau-ratan haikal

mire badan kī tapish ruuh tak utāregā
vo aa.ine meñ kabhī merā ruup dhāregā

jab havā shab ko badaltī huī pahlū aa.ī
muddatoñ apne badan se tirī ḳhushbū aa.ī

aa.e jab tere muqābil to khulā kuchh bhī nahīñ
gul-badan māh-jabīñ nuur ke dhāre saare

raat ke me.ade meñ kaarī zahr hai jaltā hai jis se tan badan merā
maiñ kab se chīḳhtā huuñ dard se chillātā phirtā huuñ

badan kāñToñ se kar Daalā hai chhalnī
hamārā gul-ruḳhoñ kī dostī ne

machal rahī hai nazar chhū ke dekhiye us ko
simaT rahā hai badan haath mat lagāo mujhe

badan ke taaq meñ jalte haiñ bas badan ke diip
ye raushnī hai bahut kam mirī zarūrat se

usī nigāh se phir tum ne mujh ko dekh liyā
badan utaar kar aayā thā kitnī mehnat se

badan se ruuh ruḳhsat ho rahī hai
mukammal qaid ġhurbat ho rahī hai

maiñ ḳhud-kushī ke jurm kā kartā huuñ e'tirāf
apne badan kī qabr meñ kab se gaḌā huuñ maiñ

ab vādi-e-badan meñ koī boltā nahīñ
suntā huuñ aap apnī sadā bāz-gasht meñ

december kī sardī hai us ke hī jaisī
zarā sā jo chhū le badan kāñptā hai

lahū meñ tairtā phirtā hai merā ḳhasta badan
maiñ Duub jā.ūñ to zaḳhmoñ ko dekhe-bhāle kaun

ḳhākistar-e-badan meñ sulagtī hai koī chiiz
bujhtā nahīñ abhī ye javānī kā shor bhī