Tags-Badan

shikast-e-jāñ se sivā bhī hai kār-e-fan kyā kyā
azaab khīñch rahā hai mirā badan kyā kyā

jhulastī shaam badalne lagī hai pairāhan
tire badan kī tamāzat meñ sehr kaisā hai

milā do dil ko apne dil se mere ek ho jaao
badan ko vasl kar do lazzat-e-mehr-o-vafā chakhkho

ma.āshre kā ho nāsūr yā badan kā ghaav
ilaaj ke liye nashtar chubhonā paḌtā hai

ye mirī ruuh kā jhagḌā thā āsmāñ ke saath
bilā-qusūr badan ban gayā nishāna mirā

ishq kī anjuman kī baat kareñ
phir kisī gul-badan kī baat kareñ

uryāñ na vo nahāyā hammām ho ki dariyā
chashm-e-hubāb ne bhī us kā badan na dekhā

jab se chalā hai tañg qamīsoñ kā ye rivāj
nā-āshnā badan bhī lage āshnā badan

jī chāhtā hai haath lagā kar bhī dekh leñ
us kā badan qabā hai ki us kī qabā badan

is ko kahāñ kahāñ se rafū kījiye 'nazar'
behtar yahī hai oḌhiye ab dūsrā badan

bachcha bhī dekh le to humak kar lapak paḌe
aisī hī ek chiiz hai vo dūdhiyā badan

dhartī ne mausamoñ kā asar kar liyā qubūl
rut phir ga.ī to ho gayā us kā harā badan

ik pal kī dauḌ dhuup meñ aisā thakā badan
maiñ ḳhud to jāgtā huuñ magar so gayā badan

bistar pe tere mere sivā aur kaun hai
mahsūs ho rahā hai koī tīsrā badan

gañgā ke pāniyoñ sā pavitra kaheñ jise
āñkhoñ ke taT pe tairtā hai jo gayā badan

rāsta de ki mohabbat meñ badan shāmil hai
maiñ faqat ruuh nahīñ huuñ mujhe halkā na samajh

kisī kī nazroñ kī narm bārish se jab bhī bhīge badan kī miTTī
sulagtī sāñsoñ ke pairahan par hadīs-e-husn-o-shabāb likhnā

koī dekhe na aa kar dāġh-e-hasrat
badan par oḌh kar chādar rahā huuñ

maiñ us kā barf badan rauñdh kar pashemāñ huuñ
magar jo duur khaḌe haiñ unheñ vo sho.ala hai

kalī kalī kā badan phoḌ kar jo niklā hai
vo zindagī kā nahīñ maut kā taqāzā hai