Tags-Badan

apne ThanDe badan ko chhūtā huuñ
jūñhī jalte haiñ haat andar se

saare badan par machā huā thā
rañgoñ kā kohrām

mirā badan jis ko chāhtā thā
kisī ne vo zahr pī liyā hai

badan kī qaid se chhūTā to log pahchāne
tamām-umr kisī ko mirā patā na milā

ik shāḳh-e-rañg haat se mausam ke chhuT ga.ī
ḳhālī badan ragoñ meñ koī loTne lagā

mujhe ġhurūr toḌnā thā mauj kā isī liye
utar paḌā maiñ naav se badan se naddī paar kī

badan pe apne Thaharne ke ek lamhe meñ
ye lams ruuh kī parteñ ujaal detā hai

ye kis kī yaad kī bārish meñ bhīgtā hai badan
ye kaisā phuul sar-e-shāḳh-e-jāñ khilā huā hai

be-sabab saḌkoñ pe āvāra sā ik nañgā badan
koī dīvāna hai zaḳhmoñ kī qabā māñgtā hai

aaj kāñTe bhī chhupā.e haiñ libādoñ meñ badan
ik zamāne meñ to fasl-e-gul bhī dāman chaak thī

ye tirī bhuul hai maiñ tere sabab zinda huuñ
mujh sā ziddī to badan toḌ ke jā saktā hai

ḳhudā ke vāste gul ko na mere haath se lo
mujhe bū aatī hai is meñ kisī badan kī sī

badan ke donoñ kināroñ se jal rahā huuñ maiñ
ki chhū rahā huuñ tujhe aur pighal rahā huuñ maiñ

ye haal hai to badan ko bachā.iye kab tak
sadā meñ dhuup bahut hai lahū meñ lū hai bahut

har chand terī ruuh kā mahram rahā huuñ maiñ
lekin tire badan se bhī ġhāfil nahīñ rahā

chūḌiyoñ kī bañsarī par raag 'mājid' gaa.e hai
ghup añdhere meñ sadā us kī badan ban jaa.e hai

badan ko jaanā hai pahlī baar aaj ruuh kī mahfil-e-tarab meñ
to aisā lagtā hai jaise koī navāb tayyār ho rahā hai

mire badan meñ simaT ga.ī hai
mire paroñ kī tamām vus.at

haqīqatoñ ke badan par koī labāda nahīñ
agar ye sach kī sazā hai to phir sazā hī sahī

ab hai duā ye apnī har shaam har sahar ko
yā vo badan se lipTe yā jaan tan se nikle