Tags-Badan

tauba karo jo sub.h meñ TuuTe badan kī shāḳh
shab meñ bayān mai kī fazīlat kiyā karo

bazm-e-jāñ phir nigah-e-tauba-shikan māñge hai
lams sho.ale kā to ḳhushbū kā badan māñge hai

ye be-kanār badan kaun paar kar paayā
bahe chale ga.e sab log is ravānī meñ

barq kiyā hai aks-e-badan ne tere hameñ ik tañg qabā
tere badan par jitne til haiñ saare ham ko yaad hue

tumhāre hī ta.alluq se to ham haiñ is badan meñ
tumhāre hī liye to ye tamāshā kar rahe haiñ

chhaTī baar jab maiñ ne darvāza kholā
to ik chīḳh mere badan ke masāmoñ se chimTī

badan merā hai ik vīrāñ makāñ, par
makīñ ban kar ye vahshat rah rahī hai

jo bhī hai sab tirī ināyat hai
jaan merī na ye badan merā

muddatoñ ghaav kiye jis ke badan par ham ne
vaqt aayā to usī ḳhvāb ko talvār kiyā

āsmānī ghanTiyoñ ke shor meñ
us badan kī har sadā maujūd hai

kañval badan par machaltī sāñseñ chhalakte sāġhar kī tarjumāñ hai
gudāz bāñheñ surāhī gardan sarāpā naqsha tirā qayāmat

ḳhayāl aatā hai akasr utaar pheñkūñ badan
ki ye libās mirī ḳhaak se ziyāda hai

hamārī umr makḌī hai hameñ itnā batāne ko
badan par jhurriyoñ kī shakl meñ jaale paḌe hoñge

badan se jab alag kartī ho tum bhīge hue kapḌe
chhamā-chham nāchtī hai jañgaloñ ke darmiyāñ bārish

byāz-e-shab-o-roz par dastaḳhat tere qadmoñ ke hoñ
badan ke pasīne se qarnoñ ke aurāq mahkeñ

koī 'āfāq' mohabbat kī himāyat meñ nahīñ
jaane kitne hī nishān us ke badan par aa.e

halkā-phulkā sā badan
buuTā sā qad

zard pattoñ ke ThanDe badan apne hāthoñ pe le kar havā ne shajar se kahā
agle mausam meñ tujh par na.e barg-o-bār ā.eñge tab talak sabr kar yā aḳhī

tum hameñ ek din dasht meñ chhoḌ kar chal diye the tumheñ kyā ḳhabar yā aḳhī
kitne mausam lage haiñ hamāre badan par nikalne meñ ye bāl-o-par yā aḳhī

ek muddat se badan barf hai lekin ab tak
karvaTeñ dil ko koī soz nihāñ detā hai