Tags-Badan

ye ruuh barsoñ se dafn hai tum madad karoge
badan ke malbe se is ko zinda nikālnā hai

havas ke biij badan jab se dil meñ bone lagā
maiñ ḳhud se milne ke saare javāz khone lagā

december kī sardī hai us ke hī jaisī
zarā sā jo chhū le badan kāñptā hai

sach zamīnī ki āsmānī ho
vo badan zinda isti.āra hai

vo mere lab ke parinde vo terā jhīl-badan
bujhā na pyaas mirī tū magar sarāb meñ aa

mire tasavvur meñ itnī vus.at nahīñ ke terā badan samā.e
maiñ tujh ko sochūñ to aisā lagtā hai hāfiza ḳhatm ho gayā hai

vo ik charāġh jo us lams ne jalāyā thā
mire badan meñ sadā us kī raushnī hī rahī

jo ḳhas-e-badan thā jalā bahut ka.ī nik.hatoñ kī talāsh meñ
maiñ tamām logoñ se mil chukā tirī qurbatoñ kī talāsh meñ

ḳhushbū mire badan meñ rachī hai ḳhalāoñ kī
maiñ sair kar rahā huuñ abhī tak fazāoñ kī

savāl ye hai ki dasht-e-badan kā kyā hogā
agar junūñ kā parinda qafas meñ aayā na.iiñ

raah meñ hai badan kī ik dīvār
jo mujhe nāḳhunoñ se Dhānī hai

mere us ke biich badan hai
aur badan meñ dil dariyā hai

na mere zahr meñ talḳhī rahī vo pahlī sī
badan meñ us ke bhī pahlā sā zā.iqa na rahā

ḳhud par hamāre jism kī chādar hī Daal le
bach aap apnī dhuup se tere badan kī ḳhair

maiñ ki andar se pighaltā hī chalā jaatā huuñ
mere yaḳh-basta badan meñ bhī sharar hai koī

bhale ye merā badan ret ban ke uḌ jaa.e
maiñ apne zor meñ bahtā rahūñgā dhāre par

jagah jagah se havā kāTne lagī hai badan
bikhar na jaa.eñ chhatoñ par kahīñ hamāre par

shahr-e-badan bas rain-baserā jaisā hai
manzil par kab rukte haiñ banjāre log

agar āñkhoñ se bah jaa.eñ to ho jaatā hai dil halkā
badan meñ ashk se bhārī bhī koī chiiz hotī hai

sulagte din meñ thī bāhar badan meñ shab ko rahī
bichhaḌ ke mujh se bas ik tīrgī nahīñ jaatī