Tags-Badan

thakan
bojhal manoñ bojhal badan apnā

charāġh bujhne lage aur merī āñkhoñ ko
badan meñ koī utartā huā nazar aayā

huuñ tasavvur meñ safā-e-badan-e-yār ke ġharq
halqa-e-nāf huā halqa-e-girdāb mujhe

na teġh-e-qātil kā kyuuñ ho shohrā kiyā hai jo rañg-e-jism aisā
diye jo Tāñke to hai ye dhokā badan kā malbūs sozanī hai

aa.ī jo bhūrī shaam sulagne lagā badan
bhīgī jo kaalī raat to añgārā ham hue

badan āġhushta-ba-ḳhūñ hone pe mauqūf nahīñ
zaḳhmī-e-nāvak-e-mizhgāñ kā nishāñ aur hī hai

vo ek shor sā zindāñ meñ raat bhar kyā thā
mujhe ḳhud apne badan meñ kisī kā Dar kyā thā

maiñ raat apne badan kī sadā se laḌtā huā
aur is kī ḳhāmushī mahv-e-kalām hotī huī

vo merī talab ho ki tirā lams-e-badan ho
nashshe kabhī andāza-e-vahshat nahīñ karte

ḳhushbū mire badan kī churātī haiñ roz-o-shab
dekho 'duā' kamāl haiñ sandal sī chūḌiyāñ

pal pal ye chhū rahī haiñ mirā jism aur badan
kartī haiñ mujh ko tañg ye sāñval sī chūḌiyāñ

badan kī ḳhaak sameTe hue ho kyā logo
safar meñ lamha-e-tark-e-safar bhī aatā hai

masjid meñ aa.e hañste hue jab vo gul-badan
ḳhushbū se sehan-e-masjid-e-jāme banā chaman

be-badan ruuh bane phirte rahoge kab tak
jaao chupke se kisī jism meñ dāḳhil ho jaao

ta.āqub mat karo us ke badan kī raushnī kā
ki ye to sirf us kā isti.āra jā rahā hai

jabīñ mahtāb āñkheñ shoḳh shīrīñ lab guhar dandāñ
badan motī dahan ġhunche adā hañsne kī pyārī hai

'jāmī' jo utar jaa.e añdheroñ ke badan meñ
vo sho.ala-e-taḳhlīq hai in.aam kisī kā

khulī sarā.e ke jaisā hai ye badan apnā
aur is sarā.e meñ chaltī rahī hai lū ab tak

lahū kī maar se bachiye ki josh meñ aa.e
to qatra qatra badan meñ shigāf kartā hai

apne safā-e-sīna kā hairān kaar hai
dekhā nahīñ hai aa.ine ne vo badan hanūz