Tags-Badan

agar rasā meñ na thā vo bharā bharā sā badan
rañg-e-ḳhayāl se us ko tulū karnā thā

jalā gayā mujhe apne badan kī ThanDak se
vo jis kā rañg dahakte gulāb jaisā hai

nahā rahā huuñ maiñ us ke badan kī kirnoñ meñ
vo aadmī hai magar māhtāb jaisā hai

qasam us badan kī
aur qasam us badan par khile phūloñ kī

rishta bhī hai nashv-o-numā kā farq bhī raushan lamhoñ kā
sabz sarāpā shāḳh-e-badan aur jañgal kī hariyālī meñ

badan se jaan to jā hī chukī thī
kisī ne chhū liyā zinda huā maiñ

chāñd bhī ab nikal aayā ufuq-e-āb ke paar
mere ġharqāb badan tū bhī ubhar paanī se

saikḌoñ the shahr meñ sūraj-badan
chāñd-tāre muntaḳhab kaise hue

bas ḳhaak paḌ ga.ī hai badan par zamīn kī
varna mushābahat to mirī āsmāñ se hai

yādeñ vo duur des vo ghar aur vo sāmne
sīmīñ badan siyāh libās ek huur kā

bahut bhārī haiñ ab miTTī kī palkeñ
badan par niiñd taarī ho rahī hai

ek ḳhvāhish ki jo sahrā-e-badan se niklī
khīñchtī hai usī jānib ko jidhar paanī hai

kyā chiiz thī kisī kī adā-e-supurdagī
bhīge badan kī aag meñ nahlā ga.ī mujhe

be-badan ruuh bane phirte rahoge kab tak
jaao chupke se kisī jism meñ dāḳhil ho jaao

jab yaad aayā terā mahaktā badan mujhe
bahlā sakī na bū-e-gul-o-yāsman mujhe

utrī huī hai dhuup badan ke hisār meñ
qurbat ke fāsloñ kā safar kāTne ke ba.ad

dobāra ruuh us meñ phūñk do tum
badan jo phir akelā aa gayā hai

badan se ruuh talak ham lahū lahū hue haiñ
tumhāre ishq meñ ab jā ke surḳh-rū hue haiñ

hai bādaloñ ke siyāh ghoḌoñ ke saath varna havā kī parchhā.īñ kis ne dekhī
dhulī dhulī dhuup ke badan par jo chhāñv jaisī subuk-ravī hai vo shā.irī hai

nahīñ misāl koī aisā be-misāl badan
hai ḳhud javāb vo apnā hai ḳhud savāl badan