Tags-Aah

huā behosh bilkul aah us kī aamad aamad meñ
gar aane se maiñ us ke bā-ḳhabar hotā to kyā hotā

aah dahqān-e-falak kī kahūñ kyā bad-tuḳhmī
ḳhāk-e-adām meñ ye nit bove hai āfāt ke biij

tum ne to hukm-e-tark-e-tamannā sunā diyā
kis dil se aah tark-e-tamannā kare koī

āh-o-nāle kī sadā bhī ab to aane se rahī
mar gayā shāyad mirā dil haa.e dil afsos dil

kyā kahūñ aah meñ tum se ki mohabbat kyā hai
ye vo shai hai ki jo insāñ ko miTā detī hai

hamārā dil bhī hai vīrāñ haveliyoñ kī tarah
tamām raat yahāñ koī aah bhartā hai

lagā.ī us ne jo jo teġh abrū kī mire dil par
lab-e-har-zaḳhm se niklī bajā.e aah bismillāh

vo āh-e-dil jise sun sun ke aap hañste the
ḳhadañg-e-nāz kā āḳhir javāb ho ke rahī

har āh-e-sard hai uftād-e-ashk kī tafsīr
ukhaḌ chale haiñ qadam vaqf-e-hādsāt huuñ maiñ

dikhāyā asar aah ne apnī 'anjum'
ki hote chale haiñ vo ab ham se vāqif

āḳhir hijāb-o-sharm kī had bhī hai mehrbāñ
parda ulaT na de mirī āh-e-sahar kahīñ

san se jā baiThte haiñ us ke tasavvur meñ ham aah
bazm-e-ḳhūbāñ meñ koī paas bulātā hai hameñ

ThanDe hone kā bhī tā samjheñ mazā itne liye
charḳh mānind-e-charāġh aah jalātā hai hameñ

kyā sitam hai ki tarīq apnā rah-e-ishq meñ aah
koī jis ko nahīñ bhātā vo hī bhātā hai hameñ

ġham-kada-e-hayāt meñ aah maiñ vo charāġh huuñ
sub.h huī jalā diyā shaam huī bujhā diyā

tum rabt ke Dhab jis se laḌāte ho 'nazīr' aah
vo dilbar-e-ayyār hai kuchh aur hī Dhab kā

girya-e-nīm-shab o āh-e-sahar-gāhī ko
chañg o barbat pe nachāte hue turkāna chaleñ

aah kartā hai ḳharāsh un kā diloñ meñ naala
kaun ye qāfile meñ nāla-zanāñ jaate haiñ

mareñ ġhair pe aap maiñ tum pe marūñ mujhe kyā hai ġharaz kaho kyuuñ maiñ jalūñ
yahī jī maiñ hai tum se na baat karūñ mujhe apnī is āh-e-rasā kī qasam

tire uThte hī pahlū meñ dard uThā tire jaate hī dam ye adam ko chalā
mujhe chhoḌ ke aah tū ghar ko na jā tujhe apne hī funduq-e-pā kī qasam