Tags-Aah

un hasīñ ā.ankhoñ meñ aañsū aa ga.e
aah mere ishq kī rusvā.iyāñ

vasl kī shab bhī maiñ na soyā aah
shab-e-hijrāñ ke ḳhauf kā maarā

aah vo kaun thā ḳhudā-mārā
jis ne us se mujhe lagā maarā

aañsū ke hai dariyā pe aa dil kā safīna tar rahā
ab 'azfarī' mat aah bhar kashtī ye tūfānī na kar

haiñ jhoñpaḌiyāñ ham-sā.e meñ mat aag in ko lag uThe
nichlī tū rah siine meñ Tuk, Tuk aah jaulānī na kar

ashkoñ kā silsila kahīñ TuuTe bhī ai firāq
thak bhī chuke qadam mirī fariyād o aah kā

kyā jāniye talāsh-e-asar meñ kahāñ ga.ī
ab tak kahīñ pata na lagā merī aah kā

ġhauġhā-e-hashr dil meñ samātā nahīñ mire
hañgāma yaad hai mujhe furqat meñ aah kā

ba-nām-e-ḳhush-nafasī ham to aah bharte rahe
ki sirf rañj kiyā ham ne, zindagī nahīñ kī

aah ko chāhiye ik umr asar hote tak
kaun jiitā hai tirī zulf ke sar hote tak

aah kyuuñ be-sadā hai hoñToñ par
lafz baaqī nahīñ zabān meñ kyā

choT dil par lage aur aah zabāñ se nikle
dard uTThe hai kahāñ aur kahāñ se nikle

aur bhī sañg-dil huā vo shoḳh
terā ai aah bas asar dekhā

naala har chand ham ne gar dekhā
aah ab tak na kuchh asar dekhā

minnat o ājizī o zaarī o aah
tere aage hazār kar dekhā

us ne uThāyā ham pe tamāñcha ham ne haTāyā muñh ko jo aah
shoḳh ne ham ko us din se phir naaz dikhānā chhoḌ diyā

tū soch bhī nahīñ saktā jis ehtimām ke saath
kaTe shajar pe parindoñ ne āh-o-zārī kī

āñkheñ mirī phūTeñ tirī ā.ankhoñ ke baġhair aah
gar maiñ ne kabhī nargis-e-bīmār ko dekhā

kamāl-e-ishq bhī ḳhālī nahīñ tamannā se
jo hai ik aah to us ko bhī hai asar kī talab

yahī dil-lagī tumhārī kisī aah meñ badaltī
jo hamāre zaḳhm ginte, kabhī ġham shumār karte