Tags-Aah

tāsīr ko na aah se pūchhūñ to kyā karūñ
kyuuñ ḳhud uThā liyā dil-e-be-mudda.ā kā kaam

kyā kahūñ aah maiñ tashbīh nahīñ de saktā
koī gul zaḳhm-e-jigar sā to gulistāñ meñ nahīñ

maiñ ye samjhā thā ham-safar hoñge
aah kitne muhīb saa.e haiñ

dil-e-bad-ḳhvāh meñ thā mārnā yā chashm-e-bad-bīñ meñ
falak par 'zauq' tīr-e-āh gar maarā to kyā maarā

baat kyūñkar bane ummīd bar aa.e kyuuñ kar
naala pur-shor nahīñ aah sharar-bār nahīñ

masnūa meñ sān.e.a nazar aave to 'nazīr' aah
nazdīk kī phir kyā hai jahāñ duur kī sūjhī

jo sail-e-ashk o āh-e-garm ko Tuk dījiye ruḳhsat
nishāñ dariyā kā gum ho naam ho nāyāb ātish kā

tirī judā.ī meñ raat saarī sabā ye kahnā ba-āh-o-zārī
badalte guzrī hai mujh ko karvaT kabhī idhar ko kabhī udhar ko

muñh zard o āh-e-sard o lab-e-ḳhushk o chashm-e-tar
sachchī jo dil-lagī hai to kyā kyā gavāh hai

is meñ koī mirā sharīk nahīñ
merā dukh aah sirf merā hai

tire kūche meñ to sāzish huī thī
vahāñ kyuuñ āh-o-zārī ho rahī hai

duniyā kā bharam na khol ai aah
ye raaz abhī khulā nahīñ hai

uftādgī meñ dil bhī sharīk-e-alam nahīñ
duniyā meñ aah kaun hai apnā kaheñ jise

aah ye dil kī kasak haa.e ye āñkhoñ kī jalan
niiñd aa jaa.e agar aaj to ham bhī so leñ

sham-e-kushta kī tarah maiñ tirī mahfil se uThā
aah kaisī vo dhuāñ thā jo bujhe dil se uThā

us sarv-qad ke ishq meñ ye phal milā 'nasīr'
har sad aah vaar kiyā ham ne kyā kiyā

dar-parda dostī huī ham apne haq meñ aah
mutrib-pisar ko yaar kiyā ham ne kyā kiyā

shikva nahīñ gila nahīñ āh-o-fuġhāñ nahīñ
apnā jo haal hai vo kisī par ayaañ nahīñ

fasl-e-gul aate hī 'uzlat' dil zabān-e-āh se
merī ḳhidmat meñ kare hai dasht meñ jaane kī arz