Tags-Barg

ga.e us ke saath chaman meñ ham to guloñ ko dekh ke ḳhush hue
kabhī sarv se kabhī nahr se kabhī barg se kabhī baar se

barg-e-ḳhizāñ kī zard sī tahrīr hai magar
dast-e-shafaq meñ phuul sunahrā khilā bhī hai

'mohsin' is tarah luTī mahfil-e-sāz-o-āvāz
gul-e-naġhma na koī barg-e-navā kuchh na rahā

maiñ na.e mausam meñ barg-e-tāza ban kar ā.ūñgā
phir mileñge ai havā-e-shaḳhsār agle baras

ik barg-e-ḳhushk se gul-e-tāza tak aa ga.e
ham shahr-e-dil se jism ke sahrā tak aa ga.e

usī ne aag lagā.ī thī mere hāthoñ ko
jise maiñ bhuul se barg-e-hinā nahīñ samjhā

ḳhilāf apne rahī vaz-e-sāz-o-barg-e-chaman
qafas bane haiñ jo tinke the āshiyāñ ke liye

haañ magar barg-e-zard kī sūrat
sub.h ko maiñ bhī shaam kartā huuñ

chaman itnā ḳhizāñ-āsār pahle kab huā thā
balā kā qaht-e-barg-o-bār pahle kab huā thā

bhaTak rahā huuñ maiñ ik barg-e-ḳhushk kī mānind
ḳhudā kisī ko na mujh jaisī be-navā.ī de

barg-e-gul se jo chiiz nāzuk hai
vaañ kahāñ ehtimāl bose kā

barg-e-gul par raqs-e-shabnam kā ye manzar ai 'ziyā'
ab to aatā hai nazar har qatre meñ dariyā mujhe

ham ne āvāz na dī barg o navā hote hue
aur milne na ga.e us kā patā hote hue

ai sabā de tū mire soḳhta-jānoñ ko ḳhirāj
un kī turbat pe hī kuchh barg-e-gul-e-tar rakh de

kisī ke vāda-e-fardā ke barg-o-bār kī ḳhair
ye aag hijr ke ban kī taraf se aatī hai

gulshan ke tā.eroñ ne kyā be-muravvatī kī
yak barg-e-gul qafas meñ ham tak na koī laayā

paanī se sag-gazīda Dare jis tarah 'asad'
Dartā huuñ aa.ine se ki mardum-gazīda huuñ

kanār-e-barg-e-tabassum laraztā qatra hai
zamīñ kī kokh meñ laavā pighaltā rahtā hai

barg-e-ḳhushk kī sūrat log ho ke āvāra
sochte haiñ sarsar kā naam kyuuñ sabā rakkhā