Tags-Barg

shajar shajar mirī aamad kā muntazir mausam
maiñ barg-e-gul sā havāoñ kī ik uḌaan meñ thā

is jahān-e-be-amāñ meñ barg-e-āvāra haiñ ham
jab chalegī tez āñdhī dar-ba-dar ho jā.eñge

shabnam ko bharosa hai bahut barg-e-amāñ par
'ḳhurshīd' bhī dānista qayāmat nahīñ karte

maiñ huuñ ik kāġhaz-e-qalam-bezār
bād-e-sarsar meñ barg-e-nam bezār

nā-gahāñ lab-hā-e-barg-e-gul se ye aa.ī nidā
naale kartā hai abas ai be-ḳhabar mere liye

kabhī shāḳh o sabza o barg par kabhī ġhuncha o gul o ḳhaar par
maiñ chaman meñ chāhe jahāñ rahūñ mirā haq hai fasl-e-bahār par

mire des kī un zamīnoñ ke beTe jahāñ sirf be-barg patthar haiñ sadiyoñ se tanhā
jahāñ sirf be-mehr mausam haiñ aur ek dardoñ kā sailāb hai umr-paimā

'adīl' log gharoñ ko sajā.e baiThe haiñ
faroġh-e-husn faqat barg-o-bār karte rahe

hamāre zaḳhm kī surḳhī baḌhā gayā 'arshad'
vo barg-e-sabz jise dast-māl ham ne kiyā

ye havā ye barg-e-gul kā ehtizāz
aaj maiñ rāz-e-musarrat pā gayā

vo to rahtā hai yūñhī apne gulistān meñ gum
lab-e-ḳhāmosh se kyā barg-e-hinā bolegī

raat jo mauj-e-havā ne gul se dil kī baat kahī
ik ik barg-e-chaman ne kaisī kaisī baat kahī

na barg-o-bār na shādābiyāñ na ġhuncha-o-gul
yahī bahār agar hai to hai ḳhizāñ kī tarah

bajā.e rañg rag-e-ġhunchā se lahū Tapke
khile jo phuul to har barg-e-gul sharar ho jaa.e

kuchh is ravish se chale bād-e-barg-e-rez-e-ḳhizāñ
ki duur tak saf-e-ashjār be-samar ho jaa.e

kahāñ hai tirī barq-e-josh-e-tajallī
ki maiñ sāz-o-barg-e-fanā chāhtā huuñ

maiñ savād-e-dasht-e-tanhā.ī kā phaltā peḌ thā
sabz zahr-e-be-kasī se mere barg-o-bār the

chaman se TuuT gayā barg-e-zard kā rishta
na aab o gil meñ samāyā na ḳhār-o-ḳhas meñ rahā

rut badal jaane se piilā paḌ gayā farsh-e-chaman
zard peḌoñ kā badan barg-e-ḳhizānī se huā

bāñdhā hai barg-e-tāk kā kyuuñ sar pe sehra
kiyā 'ābrū' kā byaah hai bint-ul-enab setī