Tags-Bedaar

yuuñ hī yād-e-ḳhudā aa jaatī hai mujh ko kabhī 'sho.ala'
ki jaise sote sote ḳhvāb se bedār ho jaanā

mire so.e hue jazbāt kā bedār ho jaanā
kisī behosh kā hai ḳhud-baḳhud hushyār ho jaanā

is gunah par mil rahī hai sañg-sārī kī saazī
pattharoñ ko niiñd se bedār karne aa.e the

is tarah chashm-e-nīm-vā ġhāfil bhī thī bedār bhī
jaise nasha ho raat kā yā sub.h kā taḌkā huā

dil ko nigāh-e-yār ke nashtar se chheḌ kar
bedār aarzū ko kiye jā rahā huuñ maiñ

kal maiñ bedār ḳhvāb-gāh meñ thā
aaj chaukhaT pe jāgtā huuñ maiñ

ījād karūñ saat samāvāt kā chehra
chehre pe tire lams ko bedār hī rakkhūñ

so rahā huuñ maiñ zamāne se tirā ḳhvāb liye
niiñd se kab mujhe bedār kiyā jā.egā

dard kī daulat-e-bedār atā ho saaqī
ham bahī-ḳhvāh sabhī ke haiñ bhalā ho saaqī

us ne apne dam ko phūñkā aur mujhe bedār kiyā
maiñ paanī thā maiñ zarra thā lambī niiñd se jaagā maiñ

sukūn-o-chain mil jaa.e ḳhudā bhī yaar ho jaa.e
agar insān meñ insāniyat bedār ho jaa.e

raat bhīgī hai 'shafaq' aao ab
ḳhvāb-e-bedār kī bāteñ kareñ kyā

jis kī ta.abīr hai ik ḳhvāb meñ chalte rahnā
kyuuñ na us ḳhvāb se bedār abhī ho jaa.eñ

kab sub.h ke naale kaam aa.e kyā girya-e-nīm-shabī se milā
is qarya-e-ḳhvāb-faroshāñ meñ tum kis ke liye bedār hue

yuuñ to kyā ḳhvāb meñ bhī yaar kā milnā mālūm
apne gar aah yahī tāla-e-bedār rahe

ek sub.h maiñ bedār huā to ḳhudā ġhā.eb thā
ye behad tashvīsh kī baat thī

subah tak uThtī rahī āh-o-fuġhāñ
kaun mujh meñ shaam se bedār hai

sub.h-e-ālām kā chehra nahīñ dekhā jaatā
ḳhvāb-e-ḳhush-rañg se bedār hue haiñ ham log

itne bedār zamāne meñ ye sāzish bharī raat
merī tārīḳh ke siine pe utar aa.ī thī

to kyā huī vo tamannā kī daulat-e-bedār
ki saare shauq hī rasm-e-shabāna ho ga.e haiñ