Tags-Bedaar

tumhārā sote sote chauñk paḌnā khab gayā dil meñ
ki aksar ḳhud-baḳhud ho ho ke ham bedār sote haiñ

yaad meñ terī raqīb-e-rū-siyah jaagā to kyā
martaba aalī na ho ḳhuffāsh-e-shab-bedār kā

uThāte haiñ maze jaur-o-sitam ke
kuchh aise ḳhūgar-e-bedār haiñ ham

jo ġhuncha so rahā thā shāḳh-e-gul par
pareshāñ ho gayā bedār ho kar

junūñ meñ gum hue hoshyār ho kar
hameñ niiñd aa ga.ī bedār ho kar

jaise ki 'nazīr' un rātoñ par qudrat bhī karam farmātī thī
bedār ḳhudā kar detā thā āñkhoñ meñ agar niiñd aatī thī

dastakeñ hoñgī dar-e-dil pe koī aa.egā
raat bhar ham isī ummīd meñ bedār rahe

sadā-e-dard kī ḳhātir tumheñ 'kausar' ne chheḌā hai
shikasta-sāz ke bedār taaro tum na so jaanā

tesha-e-nūr liye sub.h kā paiġhām liye
koī bedār mile koī to hoshyār mile

duur āfāq pe lahrā.ī koī nuur kī lahr
ḳhvāb hī ḳhvāb meñ bedār huā dard kā shahr

jo so.e hue the jo kho.e hue the
kiyā un ko yak-laḳht bedār dekho

granthī raag sun kar aadmī bedār hotā hai
zamāne kī nazar meñ sāhab-e-kirdār hotā hai

raat phūloñ kī numā.ish meñ vo ḳhush-jism se log
aap to ḳhvāb hue aur hameñ bedār kiyā

hairāniyoñ ke zaḳhm kā marham kahāñ 'nadīm'
dil sehr-e-dard se huā bedār ishq meñ

ġhazloñ kī kā.enāt kā badlā huā hai Dhañg
allāh jaane kis ghaḌī bedār ho malañg

dil Duub gayā lazzat-e-āġhosh-e-sahar meñ
bedār hai is tarah ki bedār nahīñ hai

sab lazzateñ visāl kī bekār karte ho
kyuuñ baar baar niiñd se bedār karte ho

terī nazar payām-e-yaqīñ de ga.ī magar
kuchh taaza vasvase bhī to bedār ho ga.e

tiir kī tarah kirneñ barsīñ sub.h nikalte sūraj kī
lahūluhān thā saarā chehra niiñd se jab bedār hue

jhilmilāte rahe vo ḳhvāb jo puure na hue
dard bedār Tapaktā rahā aañsū aañsū