Tags-Beenai

lab kyā khule ki quvvat-e-goyā.ī chhin ga.ī
pesh-e-nigāh vo the ki bīnā.ī chhin ga.ī

maiñ aur kitne chehre pahnūñ
bīnā.ī ke jamghaTe meñ

uTh rahī thiiñ duur tak paanī kī dīvāreñ 'ḳhalīl'
ham ye samjhe naqs koī apnī bīnā.ī meñ hai

na.e charāġh sar-e-rahguzar jalā aa.ī
havā-e-nik.hat-e-gul thī ki merī bīnā.ī

rasta ho agar yaad to ghar lauT bhī jā.ūñ
laa.ī thī kisī aur kī bīnā.ī yahāñ tak

sahrā meñ bhī dīvāreñ sī phāñd rahā huuñ
bīnā.ī kis andhe raste par le aa.ī

terī bīnā.ī kisī din chhīn legā dekhnā
der tak rahnā tirā ye ā.inoñ ke darmiyāñ

dosto! bīnā.ī baḳhshegī tumheñ un kī uḌaan
panchhiyoñ ko chhoḌ do be-bāl-o-par karte ho kyuuñ

dil kī kitābeñ paḌh nahīñ saktā lekin chehre paḌh letā huuñ
Dhaltī umr kī dhuup meñ 'sāhir' itnī bhī bīnā.ī bahut hai

jis kī bīnā.ī se ik shahr huā thā raushan
aaj be-nūr hai vo dīda-e-bīnā dekho

bahs ham ko na thī manāzir se
yuuñ thā bīnā.ī se Thanī sī rahī

bīnā.ī tere rastoñ ko thaam ke baiThī hai
tere ghar kā dar bhī vā hai āñkhoñ ke us paar

balā se maiñ agar ro ro ke bīnā.ī bhī kho baiThūñ
karūñgā kyā in āñkhoñ ko jo vo jalva na dekhūñgā

raushnī kī ik kiran bhī ab to qismat meñ nahīñ
chhin ga.iiñ āñkheñ to phir ehsās-e-bīnā.ī huā

kor hai chashm jise da.avā-e-bīnā.ī hai
shart-e-avval hai jahāñ dīda-e-hairāñ honā

dīda-e-sañg meñ bīnā.ī kahāñ se aa.e
zarf murda ho to sachchā.ī kahāñ se aa.e

'aqīl' pahle to bīnā.ī kī bashārat dī
phir us ne mujh se kahā duur tak añdherā hai

āshnā rāheñ bhī hotī jā rahī haiñ ajnabī
is tarah jaatī rahī āñkhoñ se bīnā.ī ki bas

apne ehsās pe khīñcho na lakīreñ 'shahnāz'
toḌ bhī Daalo but-e-rahzan-e-bīnā.ī ko

mujhe is jurm meñ andhā kiyā hai
ki bīnā.ī se baḌh kar dekhtā huuñ