Tags-Beenai

musalsal āhaTeñ merī samā.at hī na le jaa.eñ
bachā rakkhe hue aañsū kī bīnā.ī Tapaktī hai

bīnā.ī bhī kyā kyā dhoke detī hai
duur se dekho saare dariyā niile haiñ

sahar ke āsār jab numāyāñ hue to bīnā.ī chhin chukī thī
qubūliyat kā vo ek lamha mujassame kī tarah se chup thā

dil dekhtā rahā hai us paar kā sitāra
is paar dekhne ko bīnā.ī chāhtā hai

is adā se aa ga.e haiñ vo nazar ke rū-ba-rū
aur gahre ho ga.e haiñ is dil kī bīnā.ī ke rañg

asā dar dast huuñ us din se bīnā.ī nahīñ hai
sitāra aañkh meñ aayā thā maiñ ne kho diyā thā

kam hotī āñkhoñ ke bhītar
bīnā.ī ke shītal sargam

mahv hai aks-e-do-ālam mirī āñkhoñ meñ magar
tū nazar aatā hai markaz mirī bīnā.ī kā

Thahre to kahāñ Thahre āḳhir mirī bīnā.ī
har shaḳhs tamāshā hai har shaḳhs tamāshā.ī

ab nigāhoñ meñ na manzar hai na pas-manzar hai
ek ilzām in āñkhoñ pe hai bīnā.ī kā

ishq bīnā.ī baḌhā detā hai
jaane kyā kyā nazar aatā hai mujhe

kaun se manzar kī tābānī añdherā kar ga.ī
aisā kyā dekhā ki ab āñkhoñ meñ bīnā.ī nahīñ

merī bīnā.ī tire qurb kī marhūn hai dost
haath chhoḌvā ke bhalā tujh se kidhar jaanā hai

kitnī āñkheñ thiiñ jo apnī bīnā.ī meñ Duub ga.iiñ
kitne manzar the jo apnī pahnā.ī se ḳhatm hue

bīnā.ī ke ġhubār se manzar meñ dhuul thī
vo aa.ina sarāb nazar ke sabab se thā

nā-haq hai havas ke bandoñ ko nazzāra-e-fitrat kā da.avā
āñkhoñ meñ nahīñ hai bīnā.ī dīdār kī bāteñ karte haiñ

ho ga.ī bīnā.ī to sab us kī dīvāroñ meñ jazb
un ke ghar ko dekh kar ab apnā ghar dekhegā kaun

bīnā.ī se bāhar kabhī andar mujhe dekhe
mumkin hī nahīñ hai vo barābar mujhe dekhe

lā-fanā terī sifat thī terī hastī kā subūt
be-nishāñ terā nishāñ sūrat-e-bīnā.ī thā

apnī āñkheñ na sajānā kisī darvāze par
chashm-e-hairāñ ko bharosa nahīñ bīnā.ī kā