Tags-Aahat

tez-tar tūfāñ kī aahaT aur yahāñ miTTī na aag
ab ise aane bhī do ye mujh se kyā le jā.egā

ye kahiyo dekhā kiyā huuñ zālim uThā ke bālīñ se sar ko har dam
samajh ke paañv kī tere aahaT kabhī idhar ko kabhī udhar ko

phir kisī ke dar pe ḳhushbū de rahī hai dastakeñ
phir koī aahaT mire kānoñ se Takrāne lagī

barsoñ se ik aahaT par the kaan lagā.e ham
aaj is moḌ pe aap hī apne sāmne aa.e ham

ye zulf-bar-dosh kaun aayā ye kis kī aahaT se gul khile haiñ
mahak rahī hai fazā-e-hastī tamām aalam bahār sā hai

lo ye ummīd phir jagātī hai
ek aahaT TaTolne jaisī

merī aahaT sunñe vaalā dil na thā duniyā ke paas
rāste meñ 'ashk' be-maqsad jo bhaTkā maiñ hī thā

'saif' pahlū meñ ye aahaT ġham kī
kaun rotā hai bayābānoñ meñ

qadam qadam mirī himmat baḌhā.ī jaatī hai
nafas nafas tirī aahaT sī paa.ī jaatī hai

ḳhud apnī hī aahaT par chauñke huuñ hiran jaise
yuuñ raah meñ miltī haiñ ghabrā.ī huī ġhazleñ

ajnabī ḳhushbū kī aahaT se mahak uTThā badan
qahqahoñ ke lams se ḳhauf-e-ḳhizāñ raushan huā

bhalī ho yā ki burī har nazar samajhtā hai
har ek shaḳhs kī aahaT ko ghar samajhtā hai

kis ke qadmoñ kī aahaT hai
darvāze par kaun aayā hai

darīchoñ se mirī aahaT ko sun kar
'nazīr' ab jhāñktā koī nahīñ hai

ki ek saa.e kī narm aahaT ne rāstoñ kā nasīb badlā
koī ta.alluq ke chāñd lahje meñ apne-pan kī adā se bolā

ye raushan-dān se ma.asūm sī titlī chipaktī hai
isī aahaT ko ham ne apnī ġhazloñ kī sadā rakkhā

aahaT bhī koī pā na sake ghar se yuuñ nikal
har samt dekh-bhāl koī dekhtā na ho

koī bhī āvāz us kī aahaT nahīñ hotī
koī bhī ḳhushbū us kā paikar nahīñ rakhtī

vo tīra-chashm ki sūraj se bad-gumān rahā
ḳhud apne saa.e kī aahaT se Dar gayā kaisā

'tāriq' tasavvurāt meñ aahaT sī kyā huī
jalte ga.e charāġh jahāñ tak nazar ga.ī