Tags-Aahat

kisī ke paañv kī aahaT ki dil kī dhaḌkan thī
hazār baar uThā sū-e-dar gayā koī

har saañs ek an-sunī sī aahaT
maiñ jaane kis pe mar rahā huuñ

dil par dastak dene kaun aa niklā hai
kis kī aahaT suntā huuñ vīrāne meñ

udāsī āshnā hai is qadar aahaT se merī ab
jahāñ se bhī guzartā huuñ mujhe pahchān letī hai

maiñ niiñd meñ chaltā huā kho jā.ūñ na 'qaisar'
aahaT mire qadmoñ kī shab-e-tār meñ dekho

bahār-e-lāla-o-gul se ḳhizāñ kī aahaT tak
har ek vāqi.a mausam ne chashm-dīd kahā

ik vahm sahī phir bhī mirī nafi hai dushvār
ai dost har aahaT par agar aane lagā huuñ

paḌī huī thī niDhāl ho kar hamārī āñkhoñ ke āñganoñ meñ
kisī kī aahaT sunī to chauñkī zarā sī ghabrā ga.ī udāsī

us ke aane kī lagan meñ jī rahā huuñ is tarah
kaan aahaT par lage aTkā hai dam apnī jagah

rah-guzar bajtī hai paa.el kī tarah
kis kī aahaT ko sadā dī ham ne

be-samt rāstoñ pe sadā le ga.ī mujhe
aahaT magar junūñ kī bachā le ga.ī mujhe

dil par dastak dene kaun aa niklā hai
kis kī aahaT suntā huuñ vīrāne meñ

merī aahaT guuñj rahī hai
duniyā kī har rāhguzar meñ

ik lamha-e-taḳhlīq kī aahaT hai kahīñ par
motī koī niklegā abhī band sadaf hai

havā kī tarah maiñ be-tāb huuñ ki shāḳh-e-gulāb
lahaktī hai mirī aahaT pe ab tumhārī tarah

aahaT bhī agar kī to tah-e-zāt nahīñ kī
lafzoñ ne ka.ī din se koī baat nahīñ kī

ek aahaT se jāgtī huuñ maiñ
ek dastak hai zindagī merī

jitnī der meñ tum ek aahaT se utarte ho
aur saver se apnī palkeñ ikaTThī karte ho

kyā laḌke dillī ke haiñ ayyār aur naT-khaT
dil leñ haiñ yuuñ ki hargiz hotī nahīñ hai aahaT

aahaT kaisī bastī meñ
kaun ye rasta bhūlā hai