Tags-Bijli

kyuuñ dil kī aag le na ḳhabar duur duur kī
kaundī hai har dimāġh meñ bijlī futūr kī

ḳhud aag de ke apne nasheman ko aap hī
bijlī se intiqām liyā hai kabhī kabhī

har roz nasheman pe mire girtī hai bijlī
ghar mujh se nayā roz banāyā nahīñ jaatā

lahū se maiñ ne likhā thā jo kuchh dīvār-e-zindāñ par
vo bijlī ban ke chamkā dāman-e-sub.h-e-gulistāñ par

āshiyāñ banñe na paayā thā ki bijlī gir paḌī
baaġh abhī basne na paayā thā ki sahrā ho gayā

hayā se sar jhukā lenā adā se muskurā denā
hasīnoñ ko bhī kitnā sahl hai bijlī girā denā

bijlī nahīñ taḌaptī hai ai dil ye āsmān
parvāz uḌā rahā hai tire iztirāb kī

bane husn vaale sarāpā qayāmat javānī jab aa.ī to andāz aa.e
girā.ī kabhī shoḳh nazroñ se bijlī kabhī sharm aa.ī kabhī muskurā.e

bārish-e-abr se bijlī kī lagī bujh na sakī
ġhair-mumkin hai ilāj-e-tapish-e-dil na honā

'nāzim' ye taar bijlī ke nikle hai raah ḳhuub
bāteñ kareñge yaar ho kitnā hī ham se duur

kyā phūñk kar rahegī mire āshiyāne ko
bijlī lapak rahī hai idhar baar baar kyuuñ

garaj ke saath bijlī bhī chamaktī hai pahāḌoñ meñ
musāfir hai ki tūfānī havā ko ghar liye jaanā

tāmīr-e-āshiyāñ se maiñ ne ye raaz paayā
ahl-e-navā ke haq meñ bijlī hai āshiyāna

chamak rahī hai ye bijlī giregī tauba par
jhalak rahī hai mai-e-lāla-fām miine meñ

apnī āñkhoñ meñ abhī kauñd ga.ī bijlī sī
ham na samjhe ki ye aanā hai ki jaanā terā

zarre zarre pe bijlī sī barsā ga.iiñ
chalte chalte jo pañkhā zarā ruk gayā

aaj phir rakh kar binā-e-āshiyāñ
jī meñ hai bijlī ko mehmāñ kījiye

qafas meñ mujh se rūdād-e-chaman kahte na Dar hamdam
girī hai jis pe kal bijlī vo merā āshiyāñ kyuuñ ho

nigāh-e-shoḳh jab us se laḌī hai
to bijlī thartharā kar gir paḌī hai

ik ruup ke naam an-ginat haiñ
bijlī barsāt chāñdnī dhuup