Tags-Bijli

bolī vo sar ko piiT ke ā.ankhoñ ko kar ke laal
bijlī gire ġhazab kī tire sar pe TuuT kar

sāvan kī añdherī rātoñ meñ kis shoḳh kī yādoñ kā āñchal
bijlī kī tarah lahrā.e hai bādal kī tarah uḌ jaa.e hai

tūfāñ bhī thā āñdhī bhī thī bārāñ bhī thā bijlī bhī thī
aa.ī jo ghaTā to sab kuchh thā barsī jo ghaTā to kuchh bhī nahīñ

garjā hai baḌe zor se bādal zarā dekho
bijlī se girī jis pe kahīñ merā na ghar ho

jab kaalī ghaTā qahr kā sāmān banī thī
de kar ga.ī bijlī kā ujālā koī aahaT

kaan kī bijlī jo yaad aa.ī tirī
barq ke mānind maiñ taḌpā kiyā

kuchh qaus-e-quzah se rañgat lī kuchh nuur churāyā tāroñ se
bijlī se taḌap ko maañg liyā kuchh kaif uḌāyā bahāroñ se

kahīñ par to bijlī girī hai 'ayāz'
ka.ī kārvāñ ab bhī rāhoñ meñ the

āñdhiyāñ toḌ liyā kartī thiiñ sham.oñ kī laveñ
jaḌ diye is liye bijlī ke sitāre ham ne

bāġh-e-ālam meñ gar koī bijlī girī
raushnī ho ga.ī āshiyāñ āshiyāñ

bijlī mire naale kī juuñ chamke to muuñd āñkheñ
ai āshnā aage tū itnā na thā begāna

bijlī chalī ga.ī to vo āñkhoñ meñ rah gayā
ab chhū ke paḌh rahā huuñ ibārat kitāb kī

hosh par bijlī girī āñkheñ bhī ḳhīra ho ga.iiñ
tum to kyā the ik jhalak sī thī tumhārī yaad kī

yaqīnan kahīñ aaj bijlī giregī
yaqīnan koī āshiyāna jalegā

jo dekhī hai nigāh-e-mast-e-sāqī
to bijlī laḌkhaḌā ke gir paḌī hai

kabhī ham bhī taḌap meñ bijlī the
ab to karvaT bhī lī nahīñ jaatī

haañ tarh-e-āshiyāñ bhī unhīñ ḳhār-o-ḳhas meñ hai
bijlī jahāñ pe ḳhaas ba-rañg-e-karam ga.ī

jaise añdherī raat meñ bijlī chamak ga.ī
us ruḳh se shab ga.ī jo vo zulf-e-dotā sarak

apne dariyāoñ kī har mauj meñ bijlī hai ravāñ
zindagī kitnī dil-āvez-o-dil-ārā hai yahāñ

ik taḌap bijlī kī aur dīvār-o-dar miTTī ke Dher
ik taḌap sho.ale kī aur dariyāoñ meñ paanī na thā