Tags-Aaina

dekhnā ho agar kamāl apnā
ā.īna dekh kar mujhe bhī dekh

udhar vo aur ā.īna hai aur kākul banānā hai
idhar vahm aur ḳhāmoshī hai aur dil meñ bigaḌte haiñ

ham ne ik dūsre ke aks ko jab qatl kiyā
ā.īna dekh rahā thā hameñ hairānī se

ā.īna-ḳhāna-e-dil meñ hai vahī partav-e-huzn
naqsh-dar-naqsh vahī ḳhāl-o-ḳhad-e-shaukat-e-hijr

ā.īna-dār hoñ ki tirā parda-dār hoñ
pesh-e-nigāh terī mohabbat hai aur bas

mujhī se kyuuñ hai ḳhafā merā ā.īna 'maḳhmūr'
is andhe shahr meñ kyā ḳhud-nigar maiñ tanhā huuñ

maiñ ā.īna dekh rahā huuñ lekin ye kyā dekh rahā hai
merā aks pas-e-hairānī miTTī aag havā aur paanī

bhulātā huuñ magar ġham kī daraḳhshānī nahīñ jaatī
vo ā.īna muqābil hai ki hairānī nahīñ jaatī

kamre meñ hairān khaḌe ā.īna jaise hañste din
ḳhud se laḌ kar gaurayyā sī shor machātī do-pahreñ

ik masīhā ko mirā chashm-numā Thahrāyā
ek qātil ko mirā ā.īna-bardār kiyā

sozan o shāna o ā.īna ḳharīde ham ne
kabhī bhejā bhī to us gul ko ye saudā bhejā

vo to kahiye dil kī kaifiyyat hī ā.īna na thī
varna kyā kyā dekhte is ghar kī vīrānī meñ ham

kaisā thā vo paikar-e-ḳhūbī kyā kahiye
ā.īna do laḳht huā hairānī meñ

dikhā.ī detī hai masḳh 'nayyar' hasīn sūrat bhī zindagī kī
qusūr hai ā.īne kā is meñ ki hai ye ā.īna-gar kā dhokā

suḳhan ke ā.īna-ḳhāne ko ḳhair ho 'shahbāz'
zamāna sañg-ba-kaf hai idhar ko aa rahā hai

tanhā.ī jab ā.īna dikhlātī hai
apnī zaat kā pahroñ nazāra kartā huuñ

tū ne aġhyār se ā.īna mañgā kar dekhā
dil meñ aatā hai ki ab muñh na dikhā.eñ tujh ko

maiñ ki ā.īna thā phir sañg-e-malāmat kaisā
dil-e-ḳhūñ-gashta meñ tasvīr-e-butāñ kis kī thī

misl-e-ā.īna ḳhud-numā merā
sab se ho hai do-chār kyā kiije

tamāshā ki ai mahv-e-ā.īna-dārī
tujhe kis tamannā se ham dekhte haiñ