Tags-Aaina

na toḌte aarsī agar tum to itne yūsuf nazar na aate
ye qāfila khīñch laa.ī saarā shikast-e-ā.īna zañg ho kar

tū vo ā.īna hai jis ko dekh kar raushan huā
maiñ ne apne-āp ko samjhā kahāñ dekhā na thaa!

ye ā.īna hai ye to sach hī kahegā
kyuuñ apnī haqīqat se katrā rahe ho

har ā.īna ik aks-e-nau DhūñDtā hai
samundar kī lahreñ hoñ yā dasht kī an-ginat pattiyāñ

umr bhar pesh-e-nazar māh-e-tamām aate rahe
chand chehre ā.īna-ḳhāne ke kaam aate rahe

shānoñ kā ye ḳham tujh meñ na.ī baat hai 'saurabh'
ā.īna kabhī dekho rakho apnī ḳhabar kuchh

sadāqatoñ pe burā vaqt aane vaalā hai
ab us ke kāñpte hāthoñ se ā.īna luuñ maiñ

jhuñjhlā ke kahā us ne ye ā.īna paTak kar
muñh is meñ jo dekhegā vo yaktā na rahegā

tirā ā.īna huuñ maiñ zindagī tire aks kā maiñ amiin huuñ
hai mirī shikast tirā ziyāñ mujhe rakh bachā ke sambhāl ke

batātā hai mujhe ā.īna kaisī be-ruḳhī se
ki maiñ mahrūm hotā jā rahā huuñ raushnī se

patthar ba-dast miltā hai har shaḳhs shahr meñ
ā.īna ban ga.e haiñ to bachnā muhāl hai

dil koī ā.īna nahīñ TuuT ke rah gayā to phir
Thiik hī kah rahe ho tum Thiik na ho sakā to phir

ā.īna ho yā to aab lekin
har shakl meñ ik safā hai behtar

kar masqala-e-zikr se dil saaf tū apnā
'bedār' ye ā.īna tajallī-gah-e-haq hai

kyuuñ ā.īna kaheñ use patthar na kyuuñ kaheñ
jis ā.īne meñ aks na us kā dikhā.ī de

maiñ hairatī kisī mansūr kī talāsh meñ huuñ
kare jo aa ke ye ā.īna chuur chuur mirā

ik parī-chehra ki jis chehre se ā.īna banā
dil ki ā.īna-dar-ā.īna parī-ḳhāna banā

ā.īna gard se aTā hai 'naved'
aur be-chehragī misālī hai

dil-e-vahshī tū na kar ishq pareshāñ hogā
misl ā.īna ke phir shashdar-o-hairāñ hogā

gudāz-e-ishq se labrez thā qalb-e-hazīñ us kā
magar ā.īna-dār-e-sharm thā rū-e-hasīñ is kā