Tags-Aaina

sūrat mirī āñkhoñ meñ dekho kyā dekh rahe ho ā.īna
jis aañkh meñ koī bas jaa.e vo aañkh bhī darpan hotī hai

sāñsoñ ke ta.āqub meñ hairān milī duniyā
tasvīr bane jab ham ā.īna huī duniyā

ham usī ko kaheñge ā.īna-sāz
de hamārā jo dil shikasta joḌ

ai gul-e-rañgīñ-qabā ai ġhāza-e-rū-e-bahār
tū hai ḳhud apne jamāl-e-husn kā ā.īna-dār

mazā jab aa.e ki intiqāman maiñ dil kā ā.īna toḌ Dālūñ
mire hī hāthoñ saje haiñ aur ab mujhī pe chhānā bhī chāhte haiñ

ā.īna kah rahā hai ḳhūboñ ke saaf muñh par
haiñ ek din ye shakleñ sab ḳhaak biich aTnī

ā.īna dekhte hī vo dīvāna ho gayā
dekhā kise ki sham.a se parvāna ho gayā

gard-e-safar meñ phuul se chehre utar ga.e
ā.īna un ko dekh ke hairān rah gayā

us ko bhī sakta huā dekh ā.īna
der tak hairat se muñh dekhā kiyā

ā.īna hai jism-e-sāf us kā
kyūñkar na kahe maiñ ḳhud-numā huuñ

jauhar-e-ā.īna niiñ dikhlāyā
sāda-rū jo kamāl rakhte the

ik ye vafā ki nañg-e-ġham-e-dost hai hunūz
ik vo sitam ki husn kā ā.īna-dār hai

ik tum hī to gavāh ho mere hone ke
ā.īna to ab bhī mujhe jhuTlātā hai

na dekhnā kabhī ā.īna bhuul kar dekho
tumhāre husn kā paidā javāb kar degā

jab ā.īna koī dekho ik ajnabī dekho
kahāñ pe laa.ī hai tum ko ye zindagī dekho

ā.īna sub.h-e-shab-e-vasl jo dekhā to kahā
dekh zālim ye thī shaam ko sūrat merī

dil bas ik larzish-e-paiham hai sarāpā yaanī
tere ā.īna ko aatā nahīñ hairāñ honā

dekhī hai bahut aap ne ā.īne kī hairat
āshiq kā magar dīda-e-hairāñ nahīñ dekhā

kyuuñ nīchī nazreñ kar liiñ miyāñ ye to tū batā
ā.īna dekhte hī tujhe kyā hayā lagī