Tags-Budhapa

phir rahā hai mirī nazroñ meñ sarāpā terā
āh-o-qaid-e-sitam aur buḌhāpā terā

mohabbat hī hai asl meñ jāvedānī
buḌhāpā bhī faanī javānī bhī faanī

nikhartā buḌhāpā machaltī javānī
kahīñ but-garī hai kahīñ but-parastī

bachpan jauban aur buḌhāpā aur phir maut
sab chalte rahne kī aadat hotī hai

buḌhāpā ho to ho us rabt meñ kyuuñ kar ḳhalal aa.e
mirī yās-o-tamanna bachpane se saath khelī hai

sarmā kī chāñdnī thī javānī guzar ga.ī
jhulsā rahī hai dhuup buḌhāpā Thahar gayā

ab koī din bhī buḌhāpā Thokareñ khilvā.egā
husn hai chand roza jis pe tum ko naaz hai

mere afkār ke sote nahīñ thamne vaale
merī sochoñ pe buḌhāpā nahīñ aane vaalā

socho to javānī kabhī vāpas nahīñ aatī
dekho to kabhī aa ke buḌhāpā nahīñ jaatā

Dhalne lagī javānī jo aa.ī thī chaar din
Thahrā buḌhāpā qabr talak rahbarī ke saath

buḌhāpā chhā rahā hai mere har jazbe pe lekin
javāñ hotā chalā jaatā hai phir bhī kiina merā

chhāyā rahā ho jaise buḌhāpā nafas nafas
guzrī hai aise apnī javānī parat parat

almārī meñ tasvīreñ rakhtā huuñ
ab bachpan aur buḌhāpā ek hue

sub.h-e-tiflī hai buḌhāpā merā
shām-e-pīrī thī javānī merī

samay kī āñkhoñ se dekhiye to har ek khañDar meñ chhupe mileñge
kahīñ pe bachpan kahīñ javānī kahīñ buḌhāpā kahīñ udāsī

buḌhāpā duur hai zohd-o-vara.a jis kā taqāzā hai
javānī meñ to kuchh ishq-e-butāñ kā zikr karne do

buḌhāpā aa gayā lekin nahīñ badlā mizāj un kā
abhī tak kapḌe vo apne liye rañgīn lete haiñ

sarf kī apnī tire ishq meñ jaanī sab umr
'azfarī' ne na buḌhāpā na javānī jaanī

samay kī āñkhoñ se dekhiye to har ik khañDar meñ chhupe mileñge
kahīñ pe bachpan kahīñ javānī kahīñ buḌhāpā kahīñ udāsī

tajarbe bāñdh ke gaThḌī meñ rakhe kāñdhoñ par
ik buḌhāpā bhī javānī se nikal aayā hai