Tags-But

ye but uThā.eñ jo qur.āñ bhī ka.abe meñ ai 'rind'
ḳhudā se ham to hoñ munkir jo e'tibār kareñ

ka.abe meñ duā māñgūñgā maiñ apne ḳhudā se
yārab but-e-kāfir mujhe bulvā.e banaras

ġhaznavī to but-shikan Thahrā magar 'ḳhātir' ye kyā
tere maslak meñ use sajda ravā kaise huā

dair kī lī raah masjid chhoḌ kar
āshiq-e-but kar gayā rasta ġhalat

ḳhayāl kuchh bhī nahīñ hai tujh ko but-e-parīvash hamārā ham to
tirī mohabbat meñ naqd-e-jān-o-dil-o-jigar bhī luTā chuke haiñ

but-parastī meñ bhī bhūlī na mujhe yād-e-ḳhudā
haath meñ sub.ha gale meñ mire zunnār rahā

ḳhuld mai-ḳhāne ko kahte haiñ ba-qaul-e-vā.iz
kaaba but-ḳhāne ko kahte haiñ jo vīrāñ ho jaa.e

mire banā.e hue but meñ ruuh phūñk de ab
na ek umr kī mehnat mirī akārat kar

jis but ko merā ishq nahīñ raam kar sakā
vo ho sakegā mom tumhāre bayāñ se ḳhaak

sar-e-mimbar hai vaa.iz mo'tariz kyoñ but-parastī par
yahāñ lāzim nahīñ mard-e-ḳhudā zikr-e-butāñ karnā

dil meñ hai ai 'barq' us but ke dar-e-dandāñ kī yaad
ye guhar arsh-e-barīñ kā goshvāra ho gayā

us but ke pujārī haiñ musalmān hazāroñ
bigḌe haiñ isī kufr meñ īmān hazāroñ

is qadar khiñchnā nahīñ achchhā but-e-be-pīr dekh
pyaar kī nazroñ se sū-e-āshiq-e-dil-gīr dekh

vo but hai maiñ huuñ sāhib-e-dīñ bahr-e-faisla
hote haiñ jam.a gabr-o-musalmāñ idhar-udhar

barābar haiñ dair-o-haram ke marātib masāvī haiñ donoñ gharoñ kī haqīqat
nahīñ farq kuchh bhī hamārī nazar meñ vahī but-parastī vahī jubba-sā.ī

ye but samajhte the 'beḳhud' ko bār-e-ḳhātir kyuuñ
kisī ke dil meñ to vo ḳhānumāñ-ḳharāb na thā

hai azal suuñ jalva-pairā dil meñ hubb-e-murtazā
is sabab 'dā.ūd' daa.em dushman-e-but-ḳhāna huuñ

but bhī is meñ rahte the dil yaar kā bhī kāshāna thā
ek taraf ka.abe ke jalve ek taraf but-ḳhāna thā

āshiq kī jaan jaatī hai is bāñkpan ko chhoḌ
ai but ḳhudā ke vāste apne chalan ko chhoḌ

saj diyā hairat-e-ushshāq ne is but kā makāñ
qadd-e-ādam haiñ lage aa.ine dīvāroñ meñ