Tags-But

talqīn kare arz-e-tamannā hameñ us se
mahram nahīñ hai us but-e-ḳhud-kām se vāqif

maiñ but-kadoñ se maqābir meñ girne vaalā thā
magar sambhāl liyā ḳhush-nazar ḳhudāoñ ne

sajde jo but-kade meñ kiye merī kyā ḳhatā
tum ne kabhī kahā ye mirā āstāñ nahīñ

pūjnā but kā hai ye kyā mazmūn
aur tavāf-e-haram ke kyā ma.anī

Thikānā tirā phir kahīñ bhī na hogā
na chhūTe kabhī 'vahshat' us but kī chaukhaT

ai but-e-ḳhūñ-ḳhvār ik zaḳhmī tire kūche meñ thā
so ka.ī din se ḳhudā jaane vo ghāyal kyā huā

sad-haif vo nākām ki ik umr se 'ġhālib'
hasrat meñ rahe ek but-e-arbada-jū kī

zamāna-sāz na ho gar butoñ kī sīm-tanī
to azm-e-but-shikanī bhī hai ain barhamanī

ham ne 'ġhāfil' but-kade meñ dahr ke
ek mard-e-bā-ḳhudā dekhā tujhe

aap vo syāne raste ke har patthar ko but maan liyā
ham vo pāgal apnī raah meñ aap hī ḳhud dīvār hue

ik vahī apnā ḳhudā hai ik vahī hai apnā but
jis ke dar par sar jhukā dene se sar ūñchā huā

na samjhā umr guzrī us but-e-kāfar ko samjhāte
pighal kar mom ho jaatā agar patthar ko samjhāte

marja.a-e-gabr-o-musalmāñ hai vo but nām-e-ḳhudā
bhejte haiñ use hindū o musalmāñ kāġhaz

naaz har but ke uThā paa.e na 'jāfar-tāhir'
chuum kar chhoḌ diye ham ne ye bhārī patthar

bandagī kā maqsad-e-ālā to puurā kar diyā
sajda karne ham haram ko yā ki but-ḳhāne ga.e

tamām aalam huā jo shaidā to kuchh ta.ajjub nahīñ hai is kā
but-e-sitamgār tujh ko baḳhshā ḳhudā ne husn-o-jamāl kaisā

zāhid kisī visāl-e-sanam kī havas nahīñ
patthar kā but hai tū ki tujhe hiss-o-mas nahīñ

but-parastī meñ jis kī umr kaTī
aise kāfir kā naam are tauba

yuuñ tarāshe haiñ sanam kufr ke is duniyā ne
but-shikan hotā jo is daur meñ 'āzar' hotā

ḳhvāh ka.aba ḳhvāh but-ḳhāna ko jā
dasht-e-dil kā rahguzar hai do taraf