Tags-But

ḳhatā kyā hai un kī jo us but ko chāhā
ḳhudā chāhtā hai to sab chāhte haiñ

shaiḳh kahtā hai barhaman ko barhaman us ko saḳht
ka.aba o but-ḳhāna meñ patthar hai patthar kā javāb

haram se nikle talāsh-e-but meñ butoñ se yād-e-ḳhudā pe bigḌī
ġharaz ham āvāra-e-vafā haiñ kahīñ hamārā guzar nahīñ hai

kyuuñ kahūñ qāmat ko tere ai but-e-rā.anā alif
aur kuchh ḳhūbī nahīñ rakhtā hai ik sīdhā alif

kartā hai gar tū but-shikanī to samajh ke kar
shāyad ki un ke parde meñ zāhid ḳhudā bhī ho

kyuuñ karūñ jā ke maiñ use sajda
but-e-kāfir ḳhudā nahīñ hotā

ai dair-o-haram vaalo tum dil kī taraf dekho
ka.abe kā ye ka.aba hai but-ḳhāne kā but-ḳhāna

kyā musalmāñ hue ki ai 'momin'
hāsil us but se sharmsārī kī

fan ke but-kade meñ dāḳhil ho kar
apne rañgoñ meñ haath gholnā

but nazar ā.eñge māshūqoñ kī kasrat hogī
aaj but-ḳhāna meñ allāh kī qudrat hogī

log us but ko ḳhudā kahne lageñge 'nusrat'
tū kahīñ saa.e kī ḳhātir jo udhar jā.egā

yuuñ to dil thā ghar faqat allāh kā
but jo paale the to jā rakhnī hī thī

koī but-ḳhāne ko jaatā hai koī ka.abe ko
phir rahe gabr o musalmāñ haiñ tirī ghaat meñ kyā

gur but-e-kam-sin daam bichhā.e
bulbuleñ kyā haiñ hāthī phañsā.e

jā but-kade meñ dekhā chashm-e-yagāñgī suuñ
haq bin nahīñ disyā gar uzzā-o-lāt paayā

masājid shañkh mābad but kalīse
yaqīñ sar bhiiḌ paanī be-yaqīnī

maiñ jo yuuñ phirtā huuñ mai-ḳhānoñ meñ but-ḳhānoñ meñ
hai yahī roza namāzī mirī tanhā.ī kī

ba-zāhidāñ rag-e-gardan hai rishta-e-zunnār
sar-e-ba-pā-e-but-e-nā-nihāda rakhte haiñ

laakh murtad sahī be-dīn nahīñ haiñ vaa.iz
but na.e haiñ to ḳhudā kyā na nayā lā.eñge ham

ka.aba o dair meñ jab vo but-e-kāfir na milā
ba-ḳhudā ham ne bahut nālā-e-nāqūs kiye