Tags-But

ik nūr-e-mujassam ke parastār haiñ 'aḳhtar'
ham kah nahīñ sakte haiñ vo but hai ki ḳhudā hai

hazār rañg mire mū-qalam meñ the jin se
banā banā ke but-e-ārzū kī tasvīreñ

but-kade se chale ho kaabe ko
kyā milegā tumheñ ḳhudā ke sivā

but-e-pindār ko toḌo to ho dil paak 'jalīl'
tum ḳhudā-ḳhāna banāo isī but-ḳhāne ko

chup hai kyuuñ o but ḳhudā kī vāste
kuchh to hūñ-hāñ kar jo tujh se ho sake

but-e-ġhuncha-dahan pe nisār huuñ maiñ nahīñ jhuuT kuchh is meñ ḳhudā kī qasam
mirā tā.ir-e-dil isī qaid meñ hai mujhe zulf ke dām-e-balā kī qasam

but-ḳhāne se na ka.abe ko taklīf de mujhe
'momin' bas ab muaaf ki yaañ jī bahal gayā

ki andāz-e-nazar kī āzarī se
diloñ meñ kitne but-ḳhāne bane haiñ

ek hī pal ke liye baiTh ke phir uTh baiThī
aañkh ne sirf ye dekhā ki nashista but hai

phir kahīñ dil ke sivā un ko amaañ hī na milī
but nikāle ga.e allāh ke ghar se pahle

hijr meñ us but-e-kāfir ke taḌapte haiñ paḌe
ahl-e-zunnār kahīñ sāhib-e-islām kahīñ

mohabbat but-kade meñ chal ke us kā faisla kar de
ḳhudā merā ḳhudā hai yā ye mūrat hai ḳhudā merī

ye kufr-navāzī-e-'tabassum'
kāfir kisī but pe mubtalā hai

ba-ḳhudā haiñ terī hindū but mai-ḳhvār āñkheñ
nashshe kī Dorī nahīñ pahneñ haiñ zunnār āñkheñ

ai 'arsh' ḳhudā-o-but ahad haiñ
mushrik ko samā.ī hai duī kī

allāh re nazākat-e-lab-e-yār
but-ḳhāne paḌe jo mai-kashī kī

jism-o-jāñ ke ye sanam-zād ilāhī tauba
dil ke ujḌe hue but-ḳhāne bahut yaad aa.e

hamārā 'akbar' ek hī ḳhudā thā aur bas!
nisār but-parast go sanam sanam pe the

tum kahāñ se ye but uThā laa.e
is kahānī meñ raam thā hī nahīñ

but yahāñ milte nahīñ haiñ yā ḳhudā miltā nahīñ
azm mustahkam to ho duniyā meñ kyā miltā nahīñ